داعش بەم شێوەیە هێرشەكەی بۆ سەر حەشدی شەعبی ئەنجامداوە

سێ شەممە, 20 شوبات 2018 07:16

 

 

پارێزگاری كەركوك بەوەكالەت داوای دانانی پلانێكی ئەمنی بەپەلە دەكات بۆ وەدەرنانی تیرۆریستان، ئەوەش دوای رووبەڕووبوونەوەی چەند رۆژی رابردووی نێوان چەكدارانی حەشدی شەعبی و داعش هاتووە كە بەهۆیەوە دەیان چەكداری حەشدی شەعبی كوژران و برینداربوونە.

(راكان سەعید) پارێزگاری كەركوك بەوەكالەت راگەیەندراوێكی بڵاوكردۆتەوەو تێیدا داوای كردووە، هێزە ئەمنییەكان بە دەستێكی پۆڵاین رووبەڕووی تیرۆریستان ببنەوە‌و لێیانبدەن، دەستبگرن بەسەر مۆڵگەكانیان و چەكدارەكانیان وەدەرنێن كە ژیانی هاوڵاتیانیان كردۆتەوە ئامانج و رێگری دەكەن لە گەڕانەوەی ئاوارەكان.

جەختیشی لەوەكردۆتەوە، لە پێویستی دانانی پلانێكی ئەمنی بە پەلە بۆ روبەڕووبوونەوەی تیرۆرو پاراستنی ئاسایشی ناوچەكانی باشورو رۆژئاوای كەركوك.

سەرچاوەیەكیش لە پۆلیسی كەركوك بۆ كەركوك ناو رایگەیاند، لەكاتی هەڵمەتەكەدا رووبەڕووبوونەوەی چەكداری روویداوە‌و داعش بە چەكی ئاڕبیچی وەڵامی چەكدارانی حەشدی شەعبی داوەتەوە، لەو رووبەڕووبوونەوەیەدا ژمارەیەك چەكداری حەشدی شەعبی كوژراون و حەوتی تریان بەدیلی كەوتۆتە دەست داعش.

(جەودەت عەسافی) لێپرسراوی راگەیاندنی حەشدی شەعبی لە میحوەری باكوور رایگەیاند، داعش بەجلوبەرگ و ئۆتۆمبێلی پۆلیسی فیدراڵییەوە چونەتە سەر هێزێكی حەشدی شەعبی و لە ئاكامدا دەیان چەكداریان لێكوشتونو برینداركردووە.

 

ئـ . كـ