لەسەر ئاشكرا كردنی نهێنییەكانی لە سێدارەدانی سەدام، عێراق هاتە دەنگ

هەینی, 23 شوبات 2018 05:29

 

 

وتەبێژێكی وەزارەتی دەرەوەی عێراق دەڵێت، وڵاتەكەی لە ژێر كۆنترۆڵی هیچ وڵاتێكی بیانیدا نیـیە، ئەمەش وەك وەڵامدانەوەیەك بۆ لێدوانی بەرپـرسێكی ئێرانی كە وتبووی ئێستا وڵاتەكەی (6) وڵاتی ناوچەكەی كۆنترۆڵ كردووە، لەوانە عێراق.

(ئەحمەد مەحجوب) وتەبێژی وەزارەتی دەرەوەی عێراق بۆ ڕادیۆ سەوا ڕایگەیاند، عێراق پـێزانینی بۆ یارمەتی هەموو وڵاتانی جیهان هەیە لە شەڕی دژی تیرۆردا، لەوانە ئێرانیش، بەڵام لە هەمان كاتدا هەرچ دەستێوەردانێك لە كاروباری ناوخۆی ڕەتدەكاتەوە كە لەلایەن هەرچ وڵاتێكەوە بكرێت.

وتیشی : عێراق لەگەڵ هەموو وڵاتانی ناوچەكە پەیوەندی سیاسی و ئابوری هەیە كە لەسەر بنەمای ڕێزگرتنی بەرامبەرە.

جەختی لەوەش كردەوە، عێراق وابەستەیە بە سیاسەتی نەچوون بە ئاڕاستەی هیچ جەمسەرێك لە دژی جەمسەرێكی دیكە لە ناوچەكەدا.

جێگەی ئاماژەیە لە چەند ڕۆژی ڕابردوو (ڕەحیم‌ پـور ئەزغەدی) ئەندامی ئەنجوومەنی باڵای شۆڕشی فەرهەنگی ئێران لە لێدوانێكیدا بۆ كەناڵی تەلەفزیۆنی ئوفقی وڵاتەكەی گوتبووی: پـێنج بۆ شەش وڵاتی ناوچەكە لە ژێر كۆنترۆڵی ئەمریكا دەرچووەو هاتوونەتە نێو بەرەی ئێرانەوە، باسیشی لەوەكردبوو، كە ئەو وڵاتانە بریتین لە عێراق و سوریا و یەمەن و لوبنان و كەرتی غەززە و ئەفغانستان.

ئەم بەرپـرسە ئێرانیە هەروەها وتویەتی، جەماعەتەكەی ئێمە (سەدام حوسێن) یان لەسێدارە دا، نەوەكو ئەمریكا، ئەمەش مەبەستی ئەو گروپە شیعانەیە كە لە عێراقدا پەیوەندیـیان بە ئێرانەوە هەیە.

 

ئـ . كـ