عێراق سزای لە سێدارەدان بۆ 16 ئافرەتی تورك دەردەكات

دوو شەممە, 26 شوبات 2018 05:54

 

 

وتەبێژی ئەنجوومەنی دادگای باڵای عێراق ڕایگەیاند، دادگا سزای لە سێدارەدانی بۆ (16) ئافرەتی توركی دەكردووە دوای ئەوەی تۆمەتبار كراون بە تاوانی چوونیانەوە بۆ ناو گروپە چەكدارەكانی داعش.

جێگەی ئاماژەیە عێراق دەستی كردووە بە دادگاییكردنی سەدان ئافرەتی بیانی كە لەلایەن هێزەكانی عێراقەوە دەستگیركراون لەگەڵ سەدان منداڵیاندا.

(عەبدولستار بەیرەقدار) وتەبێژی ئەنجوومەنی دادوەری وتی : دادگای تاوانەكان كۆمەڵێك فەرمانی دەركردووە دوای ئەوەی بۆی دەركەوتووە ئەو ئافرەتانە چوونەتە ناو گروپە چەكدارەكانی داعشەوەو هەروەها دانیشیان ناوە بەوەدا كە هاوسەرگیریان كردووە لەگەڵ ئەندامانی داعشداو یارمەتی لۆجیستیكیان داون و هەروەها یارمەتیان داون بۆ ئەنجامدانی ئەركە تیرۆریستییەكان.

هەزاران هاوڵاتی بیانی لە عێراق و سوریادا لە ساڵی (2014) ەوە لە ناو داعشدا شەڕیان كردووە، كۆمەڵێك ئافرەتی بیانیش لە دەرەوە هینراون و هاتوونەتە ناو داعشەوە.

لە مانگی هەشتی ساڵی ڕابردوودا زیاتر لە (1300) ئافرەت و منداڵ خۆیان ڕادەستی هێزەكانی پێشمەرگە كرد دوای ئەوەی هێزەكانی حكومەتی عێراق لە شاری تەلەعفەر داعشیان دەركرد.

هەفتەی ڕابردوو بە هەمان شێوە (10) ئافرەتی بیانی دیكە سزای لە سێدارەدانیان بۆ دەرچوو دوای ئەوەی هەموویان بە تاوانی پەیوەندییان بە داعشەوە تۆمەتبار كران.

لە ساڵی ڕابردووشدا ئافرەتێكی ئەڵمانی سزای لە سێدارەدانی بۆ دەرچوو دوای ئەوەی ئەویش بە هەمان شێوە بە تاوانی پەیوەندییەوە بە داعشەوە تۆمەتبار كرا.

وەزارەتی دەرەوەی عێراق رایگەیاند، چوار ئافرەت و (27) منداڵیان ڕادەستی ڕووسیا كردووە دوای ئەوەی گومانی ئەوەیان لێدەكرا پەیوەندییان بە داعشەوە كردبێت و وتیشی هەڵخەڵەتێنراون.

 

ئـ . كـ