پەرلەمانتارێكی عێراق: كێ ژنی دووەم بێنێت خەرجییەكانی لەسەر من

سێ شەممە, 13 ئازار 2018 08:48

 پەرلەمانتارێكی عێراق وەكو هاندانێك بۆ فرەژنی لە عێراقدا، رایگەیاند هەر كەسێ ژنی دووەم یان سێیەم بهێنێت، ئەوا كرێی خانووی ژنی دووەم یان سێیەمی بۆ ماوەی ساڵێك دابین دەكات.

جەمیلە عوبەیدی كە بە خاوەنی پرۆژەی فرەژنی لە عێراق ناسراوە، لە لاپه‌ره‌ی تایبه‌تی خۆیدا لە تۆڕی كۆمەڵایەتی فەیسبووكدا نووسیویەتی "هەر پیاوێك دەیەوێ ژنی دووەم و سێیەم بهێنێت، بەڵام پارەی نیە، با نامەم بۆ بنێرێت، من خەرجییەكانی بۆ دابین دەكەم، كرێی ساڵێكی خانووشی بۆ دەدەم.

پەرلەمانتارەكە بۆ پیاوانی عێراقی دووپات كردووەتەوە كە بۆ هێنانی ژنی دووەم، پێویستیان بە رەزامەندی ژنی یەكەم نیە.

ئەوەشی راگەیاندووە كە ئەو پارێزەری تایبەت بۆ پیاوان لە هەموو پارێزگاكانی عێراق دەگرێت كە دەیانەوێ ژنی دووەم و سێیەم بێنن، ئۆتۆمبێلی تایبەتیشیان بۆ دەگرن، تا لە ماڵەوە بیانگوازنەوە دادگا و دواتر ئەنگوستیلەش بۆ بووك و زاوا وەكو دیاری پێشكەش دەكەن.

عوبەیدی لەدایكبووی ساڵی 1965ە لە شاری مووسڵ، پێشتر ئەندامی ئەنجوومەنی پارێزگای مووسڵ بووە بۆ دوو خول، دەرچووی خوێندنی ئێوارانی كۆلێژی یاسایە لە زانكۆی حەدبای مووسڵ، پێشتر مامۆستای قۆناخی سەرەتایی بووە.
 
 
 
هونه‌ر بانه‌گوڵانی