عێراق 10 رۆژی تر دەكەوێتە بۆشایی دەستووری

پێنج شەممە, 21 حوزەیران 2018 06:11

 

 

چاودێرانی سیاسی پێیان وایە دوای تەنها 10 رۆژی تر عێراق پێدەنێتە نێو بۆشایی یاسایی و دەستووری، چونكە دوای (12/5) و ئەنجامدانی پرۆسەی هەڵبژاردنێكی پڕ لەساختەكاری و تەزویرو دواتریش سووتانی بەشێك لەدەنگەكان، تاكو ئێستا لایەنە سیاسییەكان نەیانتوانیوە حكومەت پێكبهێنن.

لەگەڵ ئەوەی هەردوو لایەنی براوەی هەڵبژاردنەكان (سائیرون و فەتح) زۆرینەیان بردووە، بەڵام تاكو ئێستا ئەوانیش نەیاتوانیوە متمانەی لایەنەكانی تر بەدەستبهێنن بۆ ئەوەی هاوپەیمانی دروست بكەن و كار بۆ پێكهێنانی حكومەت بكەن، ئەمە جگە لەوەی لەنێو سائیرونی لیستی براوەی (موقتەدا سەدر) یش جیاوازی هەیە لەوەی زۆرینەی سیاسی بێت یان بەشداری سیاسی بێت.

بەپێی چەند راپۆرتێكیش ئێران هەوڵەكانی چڕ كردۆتەوە تاكو كۆسپ و لەمپەری نێوان كوتلە گەورەكان لابدات، تاكو بۆ بەرلە كۆتایی ئەم مانگە حكومەتێك دروست بكرێت.

چەند كوتلەیەكی سیاسی بەهیچ شێوەیەك رازی نین پاڵێوراوانی نێو حزبی دەعوە پۆستی سەرۆك وەزیران ببەن، ئەمەش لەگەڵ ئەوەیە كە ئەو حزبە پۆستی سەرۆك وەزیرانی لەماوەكانی رابردوو وەرگرتووە.

لەلایەكی ترەوە (موقتەدا سەدر) ی سەرۆكی رەوتی سەدر نەرمی نواندووە لەبەرامبەر (نوری مالیكی) و لەگەڵ راوێژكارەكانی كۆبوونەوەیەكی سازكردووە بۆ رازی بوون بە گەڕانەوەی مالیكی بۆ نێو ئەو هاوپەیمانیەی كە دروستی دەكەن، بەڵام دەبێت لە ژێر فەرمانی ئەواندا بێت.

ئەمەو لە ئێستادا رۆڵی ئێران بۆ پێكهێنانی حكومەتی نوێی عێراق لە ئەمریكا زیاتر چڕبۆتەوە، بەشێوەیەك لەهەوڵدایە تاكو یەكێتی نیشتمانی كوردستان رازی بكات بۆ ئەوەی بچێتە نێو كوتلە گەورەكان و لەهەوڵیش دایە چەند لایەنێكی سوونیش پەلكێش بكاتە نێو ئەو لیستە گەورەیەی كە لایەنە شیعییەكان دروستیان كردووە.

 

 

ئـ . كـ