" حكومه‌تی عیراقی ده‌توانێت 10%ی داواكارییه‌كانی خۆپیشانده‌ران جێبه‌جێ بكات "

شەممە, 21 تەمموز 2018 12:04

خۆپیشاندەرانى شارەکانى باشوورى عێراق (90) داواکارییان هەیە و حکومەت تەنها (10%)ى ئەو داواکارییانەى پێ جێبەجی دەکرێت.

رۆژنامەى عەرەبى جەدید لە زارى سەرچاوەیەکەوە ئاشکرا کردوە ئەو داواکارییانەى خۆپیشاندەران و خەڵکى شارەکانى باشورى عێراق ئاڕاستەى حکومەت و دەسەڵاتدارانیان کردوە (90) داواكارى تێپەڕاندوە کە زۆربەیان پێداویستى خزمەتگوزارین جگە لەوەى هەندێک لە داواکارییەکان دورخستنەوەى کارەبەدەستانى ئەو ناوچانەن لە پارێزگار و قائیمقام و بەڕێوەبەران و بەرپرسانى ناوخۆیین، لەگەڵ لەکارخستنى ئەنجومەنى پارێوگاکان و کردنەدەرەوەى بارەگا حیزبیی و هێزە چەکدارەکان.

بەپێى زانیارییەکانى ئەو سەرچاوەیە خۆپیشاندەرانى بەسڕە (29) داواکارى و زیقار (19) داواکارى و نەجەف (23) داواکارى و بابل (17) و موسەننا (40) داواکارى و قادسیە و ناوچەکانى دیکە (11) داواکارى، بەڵام ئاماژەى بەوەشکردوە کە بەشێک لە داواکارییەکان جێبەجێکردنیان ئەستەمە و پێویستییان بە هەموارى دەستوور هەیە.
سەرچاوەیەکى ئاگادار لە حکومەتى عێراقیەوە بە رۆژنامەکەى وتوە؛ حکومەت ئەو داواکارییانەى بەدەست گەیشتوە، بەڵام جێبەجێکردنیان لە ساڵێکەوە بۆ چوار ساڵى دەوێت و لەگەڵ ئەوەشدا حکومەت تواناى جێبەجێکردنى تەنها (10%)ى داواکارییەکانى خۆپیشاندەرانى باشورى هەیە.

ئەوە لەکاتێکدایە لەسەرەتاى ئەم مانگەوە لە شارەکانى باشورى عێراق خۆپیشاندانى بەرفراوان دژ بە گەندەڵى و نەبونى خزمەتگوزاری بەڕێوەدەچێت و بەهۆى ئەو بارگرژى و ئاڵۆزییانەى خۆپیشاندانەکانەوە زیاتر لە (600) کەس بونەتە قوربانى کە نزیکەى نیوەیان لە هێزە ئەمنییەکانن.


f.q