ڕۆیتەرز: ئەمریكا چەكدارە دەستگیركراوەكانی داعش لە سووریاوە گواستۆتەوە بۆ عێراق

30/05/2019 - 13:58 بڵاوکراوەتەوە لە هەواڵ/عێراقی

 

ئاژانسی هەواڵی ڕۆیتەرز ئاشكرایكرد كە ئەمریكا چەكدارە دەستگیركراوەكانی داعش لە سووریاوە دەگوازێتەوە بۆ عێراق.

 

ئاژانسی هەواڵی ڕۆیتەرز لە ڕاپۆرتێكدا ڕایگەیاند: بە پشت‌بەستن بە دیمانە لەگەڵ ژمارەیێك زیندانیی داعش و سەرچاوە عێراقیەكان و دەستكەوتنی چەند بەڵگەنامەیێكی دەزگای دادوەریی عێراق دەركەوتووە كە ئەمریكا لە كۆتاییەكانی ساڵی 2017 به شێوەی‌ نهێنی نزیكەی 30 چەكدار و گومانلێكراوی بەندكراوی داعشی لە سوریاوە گواستووەتەوە بۆ عێراق.

 

لە ڕاپۆرتەكەی ڕۆیتەرزدا باس لەوە كراوە كە دادگەكانی عێراق تۆمەتی سێ كەس لەو چەكدارانەیان ساغ كردووەتەوە و حوكمی لەسێدارەدانیان بۆ دەرچووە و پێنجی دیكەشیان زیندانی هەتاهەتاییان بۆ بڕاوە.

 

بەڵام دەزگای دژەتیرۆری عێراق ئیدعای گواستنەوەی چەكدارانی داعش لە كۆتاییەكانی ساڵی 2017 و سەرەتای ساڵی 2018 لە سووریا بۆ ئەو وڵاتە ڕەت دەكەنەوە.

 

بە گوێرەی ئەو بەڵگانەی لە دەزگای دادوەریی عێراق دژی ئەو كەسانە تۆمار كراوە، چەكدارانی گواستراوی داعش لەلایەن هێزەكانی سووریای دیموكراتەوە دەستگیر كراون و پێش لەوەی ڕادەستی دەسەڵاتدارانی عێراق بكرێن لە هەندێك كەمپی هەرێمی كوردستان و ئۆردۆندا زیندانی كراون.

 

هەندێك لە دەستگیركراوانی داعش بە ڕۆیتەرزیان ڕاگەیاندووە: دوای ئەوەی كە لە كۆتاییەكانی ساڵی 2017 و سەرەتای ساڵی 2018 لەلایەن هێزە كوردییەكانەوە لە سووریا دەستگیر كران ڕادەستی هێزی ئەمریكا كران و دواتر چاویان داپۆشراوە و لە ڕێگای كۆپتەرەوە بۆ شوێنێكی دیكە گواستراونەتەوە.

 

چەكدارانی دەستگیركراوی داعش كە بڕیاری لەسێدارەدان و زیندانی هەتاهەتاییان بۆ دەرچووە باس لە ئەشكەنجە و تۆقاندنیان لەلایەن هێزی ئەمریكاوە دەكەن و ئیدعایان كردووە‌ لە عێراقیشدا ئەشكەنجە دراون بەڵام بەرپرسانی عێراقی ئەشكەنجەدانی ئەوان ڕەت دەكەنەوە.

 

ساڵی ڕابردوو هەندێك ڕاپۆرت بڵاو كراویەوە كە تێیدا باس لەوە كرابوو هێزی كوردی سووریا چەكدارانی دەستگیركراوی داعشی ڕادەستی هێزەكانی عێراق كردووە

 

 

 

س ب