جوتیارێكی هەڵەبجەیی پلەی یەكەم لەئاستی كوردستان بەدەست دەهێنێت

15/05/2016 - 10:20 بڵاوکراوەتەوە لە هەواڵ/كوردستانی

كوردیو ـ هەڵەبجە ـ حەیدەر حەمە صاڵح
بەشەونخونی ئارەقەی نێوچەوانی و هێزو بازوی لەناوچەرگەی دەشتی شارەزووردا جوتیارێكی هەڵەبجەیی لەبواری بەرهەم هێنانی كشتوكاڵداپلەی یەكەم لەئاستی هەرێمی كوردستان بەدەست دەهێنێت.

 

ئازاد محەمەد ئەو جوتیارە كوردە هەڵەبجەییەیە كەلەلایەن كۆمپانیایی (جایكا)ی یابانیەوە پلەی یەكەمی پێدەبەخشرێت ولەسەر زاری خۆیەوە چیرۆكی سەركەوتنی بەرهەمەكانی و بەدەست هێنانی پلەی یەكەمی بۆ كوردیو دەگێرَێتەوە .

 

ئەو جوتیارە بەم شێوەیەخۆی ناساد:من كورە جوتیارێكی ئەمشارەم و لەساڵی 1972دا لەدایك بووم و باوكیشم بە (حەمەی سافە بەناوبانگە ) پیشەی جوتیاریشم لە باوكمانەوە بۆ ماوەتەوە، بەڵام جیاواز لەو كارە جوتیارییەی كە پێشتر ئەوان كردویانە، 18 ساڵەی كاری باخداری و كشتوكاڵ ئەكەم 10-15 ساڵە لەبەیتی پلاستیكیدا ئیش دەكەم و زانست و ئەزمونێكم وەرگرتوە ،ئاوات و خولیام ئەوە بوو كە ڕۆژێك ببمە خاوەنی پارچە زەویەك بەدڵی خۆم ئەوەی لەبیر و خەیاڵمدا هەیە تێیدا بنێژم یان بچێنم سوپاس بۆ خوا ئەو ئاواتەم هاتۆتەدی و ئێستا بەدڵی خۆم و بەوپەڕی شەوقەوە كاردەكەم و ساتێكیش بۆ پشودان ناناسم .

 

ئازاد محەمەد درێژەی بەوتەكانی دا و ئاماژەی بۆ ئەوە كرد ئەم زەویە ڕوبەرەكەی چوار دۆنمە وئەو بابەتانەی كە بەرهەمیان دەهێنم (خەیار ، كولەكە ، بیبەر ، ترۆزی ،شیلك ،تەماتە بەهەمو جۆرەكانی، باینجان ، زەڕات ) میوەكانیش زیاتر ئێستا (قەیسی و ترێ )یە بەڵام زیاتر پشتم بە خەیار و تەماتەو كولەكەو زەرات بەستوە ، لەڕێگەی كشتوكاڵی سیروانەوە ناسێنرام بەڕێكخراوی جایكا كە دوو جۆر تۆویان هێنابوو وەك (بروكلی ,زەرات) ئەوەبوو بەیتێكم كرد بەڕێنمایی ئەوان و پێنجیش بۆ خۆم ئەوەی خۆم 15 ڕۆژ پێش ئەوەی ئەوان هاتە بەرهەم .

 

ئازاد محەمەد وتی بەردەوام لەلایەن كەسانی پسپۆڕو شارەزاوە لە بەكرەجۆوە سەردان دەكرێم و ڕێنمای نەزەری وەردەگرم بەڵام بۆخۆم زیاتر پشتم بە ئەزمونی خۆم بەستوە چ لە شێوەی ئەندازەی ناشتنەكان و كێڵان و دابەشكردنی ئاو هەڵبژاردنی جۆرەكانەوە لەگەڵ ئەوەشدا بەردەوام خۆم سەرپەرشتی دەكەم و بەم دەست و پەنجانە ناخی ئەو خاكە هەڵدەدڕم ،خۆم (پەین) بەرهەم دەهێنم و دوركەوتومەتەوە لە سەمادی كیمیایی ،من خۆڵەمێشم و ڕیقنەو پاشەڕۆی ئاژەڵم بەكار هێناوە بەپەرداخ بن بن كردومەتە بنی شەتڵەكانەوە .

 

ئەو جوتیارە بەردەوام بوو لە قسەكانی بەهەردوو دەستی خاكەكەی ماچ كرد دەشتی شارەزوری بە چاوەكانی خۆی چواند و ئاماژەی بەوە كرد: دەشتی شارەزوور خاكێكی بەپیت و ئاڵتونە بەقەدەر چاوم خۆشم دەوێ‌ نانی ماڵ و منداڵ و تەنانەت چەند كرێكارێكیش كە لەگەڵم كاردەكەن لەم خاكەوە بەرهەم دەهێنم و بازارەكانی كوردستانی پێ گەرم گور دەكەم، سوپاسی خودا دەكەم داهاتیشی باشە ئەگەر لەدەرەوە ئەم بابەتانە هاوردە نەكرێت.

 


سەبارەت بەدەمەوە بونی حكومەت و لایەنە پەیوەندی دارەكانیش ئازاد محەمەد نەیشاردەوە كە هەندێك هاوكاری و بەدەمەوە بوون كراوە بەڵام ئەو چاوەڕوانی زیاتر بوو وتی: سوپاسی خوا ئەكەم سەلیقەیەكی پێداوم نامەوێ‌ هەرخۆم سودی لێ ببینم بەڵكو دەمەوێ‌ خەڵكانێك بێن دەورەیان بۆ بكەمەوە لەبەردەستم فێربن، با قوتابیانی بەشی كشتوكاڵ بێن بۆ ئێرە ئەوەی خوێندویانە بە كردەیی بیبینن ، ڕۆژانە دۆستانم لە ئەو كەسانەی لەم جۆرە كارەی ئێمە دەكەن پەیوەندیم پێوە دەكەن و زانیاریان پێدەدەم ،ئەمەوێ‌ حكومەت هاوكارێكی باش بێت ،كارەكەمان بنرخێنێ‌ ،لێمان بكڕێتەوە ،بەرهەمی خۆماڵیمان گەشە پێبدات .

 


ئازادی حەمەی سافە بەردوام بوو لە قسەكانی ئەوەی خستەڕوو : تا ئێستا هیج جۆرە تۆو ێكم پێنەدراوە خۆمان تۆو دەكرین هەموو ساڵێك 30-40 وەرەقە بەتۆو ئەدەم لەهەمانكاتدا هاندان و بەدەمەوە بوون زۆر لاوازە لەلایەن حكومەتەوە .

 


ئازاد وەك خۆی وتی زۆر بەلێزانانە هەستاوە بە پێوەن كردن و تاگەشتۆتە ئەوەی بە ئومێدی توێژینەوەیەكی سەركەوتوو بەرهەم بهێنێت ڕوەكی پونگەی پێوەن كردوە لە داری توو، باینجان لە تەماتە و چەندین جۆری تریش ئەو تاكە كێشەیەك كە هەیبوو گیاكەڵەبوو وتی: كێشەی ئێمە بونی گیایەكە بەناوی (گیا كەڵە ) كە دوژمنی هەموو جۆرە زەراعەتێكە ، خۆشبەختانە تا ڕادەیەك توانیومە ئەو كێشەیەش كەم بكەمەوە ، بەردوام نەخۆشی و گرفتی خۆرەی تر هەیە وە ك جاڵجاڵۆكەو كوللەو جۆرە مێشولەیەكیش هەیە ئەویش دەستەوەسان نیم لە بەرانبەریان و چارەسەر دەبن بە ویستی خوا .

 


ئازاد محەمەد ناسراو بە ئازادی حەمەی سافەخوێندنی بنەرەتی تەواو كردوە خێزاندارەوە خاوەنی دوو كوڕ و دوو كچە لێرەوە دەڵێت: خێزانەكەم زۆر هاوكارێكی باشمە بۆیە لێرەوە زۆر سوپاسی دەكەم سوپاسی ماڵ و منداڵم دەكەم سوپاسی ئەو كەسانەدەكەم كە هاوركاریان كردوم بەتایبەتی ئەم دوو خێزانەی ئێستە لەلای من كار دەكەن وسوپاسی بۆ ماڵپەری كوردیوش بۆ ئەم بەسەر كردنەوەیە.

 

 

 

سەلام بێستانسوری