ئاری هەرسین، لە بارەی ناردنی ئەدهەم بارزانی بۆ سلێمانی قسەی هەیە

ڕێبین عەلی 16/05/2016 - 10:40 بڵاوکراوەتەوە لە هەواڵ/كوردستانی

ئاری هەرسین پەلەمانتاری پارتی دیموکراتی کوردستان ڕایگەیاند، ناردنی ئەدهەم بارزانی وەک بەرپرسی یەکەم لە سلێمانی و هەڵەبجە زۆر پەسەندە و جێی خۆیەتی.

لە لاپەرەی تایبەتی خۆی لە تۆڕی کۆمەڵایەتی فەیسبوک ئاری هەرسین پەرلەمانتاری لیستی پارتی لە پەرلەمانی کوردستان، سەبارەت بە ناردنی ئەدهەم بارزانی وەک بەرپرسی یەکەمی پارتی لە پارێزگای سلێمانی و هەڵەبجە نوسویەتی "بڕیاری ناردنی شێخ ئەدهەم بارزانی وەک بەرپرسی یەکەم لە پارێزگای سلێمانی و هەڵەبجە زۆر پەسەندە و جێی خۆیەتی".

هەروەها ئاری هەرسین نوسیویەتی "کاک شێخ ئەدهەم برایەکی بەڕیز و هاوڕێیەکی نزیکمە و ئینسانیکی نیشتیمان پەروەر، پاک و لە ئیشکردندا زۆر جدی و متەوازیعە".

لە بەشێکی تری نوسینەکەیدا ئاری هەرسین ئاماژەی بەوەکردووە، ئەو وەک پارتیەکی خەڵکی سلێمانی بە هەموو شێوەیەک پشتیوانی ئەدهەم بارزانی دەکات.

نوسیویشیەتی "دڵنیام كاكه‌ شێخ به‌ بایه‌خدان به‌ گه‌نجانی دڵسۆزی پارتیمان له‌م ده‌ڤه‌ره‌ (نه‌ك ئه‌و گه‌نجانه‌ی ئاڵوده‌ی نه‌خۆشی ماستاو ساردكردنه‌وه‌ و مه‌رایی كردن بوون) له‌شكرێكی كه‌سانی مه‌بده‌ئی پاڵپشتی له‌ به‌رنامه‌كانی ده‌كه‌ن و ده‌بنه‌ تیمێكی به‌هێزو ڕاستگۆو كاریگه‌ر بۆ كاری حیزبایه‌تی مۆدێرن".

ئاری هەرسین دەستخۆشی لە مەکتەبی سیاسی حزبەکەی کردووە و ئاماژەی بەوەکردووە، چیتر بوار بۆ خەڵکانی هەلپەرست نابێت و دەسەڵاتیان بەرتەسک دەبێتەوە و، ئەو بابەتیشی بە هەواڵی خۆش بۆ پارتییەکانی دەڤەرەکە ناوبردووە ، وەک "ئازاترین و مەحرومترینن".


ڕێبین عەلی