سلێمانی... نەقیبێكی هێزەكانی 70 سوكایەتی بە ئەفسەرێكی هاتووچۆ دەكات

19/05/2016 - 11:24 بڵاوکراوەتەوە لە هەواڵ/كوردستانی

كوردیو - سلێمانی
وتەبێژی پۆلیسی هاتووچۆی سلێمانی ڕایدەگەیەنێت: لە دوای ئەوەی دوێنێ لەلایەن نەقیبێكی هێزەكانی 70 سوكایەتی بە كارمەندێكی هاتوچۆ دەكرێت، سكاڵای یاسای لەسەر ئەو نەقیبە تۆمار كرا.

 

كاروان محەمەد وتەبێژی پۆلیسی هاتووچۆی سلێمانی بە كوردیو ڕاگەیاند: دوێنێ لە كاتی ئەنجامدانی كاری ئاسایی ڕۆژانەی خۆیان، تیمێكی هاتووچۆی سلێمانی ڕێوشوێنی یاسای دەگرنەبەر بەرامبەر ئەو ئۆتۆمبێلانەی كە سەرپێچی یاسایان كردووە، لە ئەنجامدا یەكێك لەو شۆفێرانە نەقیبێكی هێزەكانی 70 دەبێت و مۆڵەتی شۆفێری پێ نابێت، لە پاش لێ پرسینەوە و گرتنەبەری ڕێوشوێنی یاسای لەلایەن كارمەندێكی هاتوچۆوە بە پلەی مفەوز، ئەو نەقیبەی هێزەكانی 70 سوكایەتی بە كارمەندەكەی هاتووچۆ دەكات و پاشان دەیباتە فەرنماندەیەكەی و لێ دەدەن و سوكایەتی پێ دەكەن.

 

هەروەها وتیشی: تیمێكی هاتوچۆی سلێمانی دەچنە فەرماندەی و كارمەندەكەی هاتووچۆ دەهێننەوە و پاشان ئەو كارمەندەی هاتوچۆ لە دادگا سكاڵایی یاسای لەبەرامبەر ئەو نەقیبەی هێزەكانی 70 تۆمار دەكات.

 

جێگای ئاماژەپێدانە ئەمە چەندەهەمین جارە لە هەرێمی كوردستان لەلایەن بەرپرسان و هاوڵاتیانەوە سوكایەتی دەكرێت، بە تایبت بە كارمەندانی هاتووچۆ كە بەردوام خزمەتی هاوڵاتیان و شۆفێران دەكەن.

 

 


سەلام بێستانسوری