بڕوانامەی ڕێزلینان بەخشرایە وتەبێژ و بەڕێوەبەرانی ڕاگەیاندن

24/05/2016 - 15:46 بڵاوکراوەتەوە لە هەواڵ/كوردستانی

كوردیو - هەولێر

سەر لە بەیانی ئەمڕۆ ٢٤ی ئایاری 2016 لە مەراسیمێكدا بە ئامادەبوونی سەفین دزەیی، وتەبێژی فەرمی حكومەتی هەرێم ، كۆمەڵەی پەیوەندییە گشتییەكانی كوردستان بڕوانامەی ڕیزلێنانی بەخشیە وتەبێژ و بەڕێوەبەرانی ڕاگەیاندن لە دامودەزگاكانی حكومەتی هەرێمی كوردستان .

لە سەرەتای مەراسیمەكەدا رسول صالح، سەرۆكی كۆمەڵەی پەیوەندییە گشتییەكانی كوردستان ووتی: بە داخەوە سەندیكای ڕۆژنامەنووسانی كوردستان وتە بێژ و فەرمانبەرانی بەڕێوەبەرایەتییەكانی ڕاگەیاندن بە ئەندام وەرناگرێت، بۆیە ئێمە بە پێویستمان زانی ئەم كۆمەڵەیە دابمەزرێنین بۆ ئەوەی ببێتە چەترێك بۆ كۆكردنەوەی كادیرانی ئەم بوارە و پاڵپشتی و هاندانیان .

ووتیشی: ئێمە لە بەرنامەمان دایە لەمەودوا خولی بەردەوام بۆ پەیوەندكاران بكەینەوە و لە نوێترین داهینان و ڕووداوەكانی ئەو بوارە سوودمەندیان بكەین و هانیان بدەین بۆ ئەوەی زیاتر پەیوەندی لەگەڵ هاووڵاتیان و دەزگاكانی ڕاگەیاندن دروست بكەین.

پاشان سەفین دزەیی، وتەبێژی فەرمی حكومەت و سەرۆكی فەرمانگەی میدیا و زانیاری لە وتەیەكدا باسی لە گرنگی میدیا و ڕۆلی لە پێشخستنی وڵات و گەیاندنی زانیارییەكان بە شێوەیەكی راست و دروست كرد.

ووتیشی: ئێمە لە بەرنامەمان دایە ئەم كەرتە ڕێك بخەین و هەموو بەڕێوەبەرایەتییەكان پەیڕەوی یەك سیستەم بكەن و ئازادی زیاتر بە وتەبێژ و بەڕێوەبەرانی راگەیاندنەكان بدەین بۆ ئەوەی بتوانن كارەكانیان بە جوانی رایی بكەین .

وتەبێژی حكومەت خۆشحاڵی خۆی بەم كۆبوونەوەیە دەربڕی و هیوای خواست ئەم كۆبوونەوانە بەردەوامیان هەبێت و پاڵپشتی حكومەتی بۆ ئەم توێژە دەربڕی و چەند بەڵێنێكی بۆ پەیوەندكاران خستەڕوو.

دواتر بڕوانامەی ڕێزلێنان بەسەر ئەو بەشە لە وتەبێژ و بەڕێوەبەرانی ڕاگەیاندن كە ئامادەبوون دابەشكرا و كە كۆی بڕوانامەكان ٥٣ بڕوانامەبوون و زۆربەی وەزارەت و دەستە و بەڕێوەبەرایەتییە گشتییەكان و چەند كۆمپانیایەكی لە خۆ گرتبوو .

م. كانی