كاتی دابه‌شكردنی موچه‌ی مامۆستایان گۆڕانكاری به‌سه‌ردادێت

ڕێبین عەلی 31/05/2016 - 00:23 بڵاوکراوەتەوە لە هەواڵ/كوردستانی

بەڕێوەبەری گشتی پەروەردەی پارێزگای سلێمانی ڕایدەگەیەنێت، لەكاتی دابەشكردنی مووچەی مامۆستایانی ناوشار بە میكانیزمێك دابەشكردنی مووچە دەگۆڕین، كە كاریگەری لەسەر هۆڵی تاقیكردنەوەكان نەبێت.
دڵشاد عومەر، بەڕێوەبەری گشتی پەروەردەی پارێزگای سلێمانی لە لێدوانێكی رۆژنامەوانیدا ڕایگەیاند، ڕۆژی پێنج شەممە لەگەڵ دەستپێكی یەكەم تاقیكردنەوەی ئەزمونە گشتیەكان مووچەی مامۆستایانی ناو شار دابەشدەكرێت، بەڵام بۆئەوەی كاریگەری لەسەر بەڕێوەبەر و یاریدەدەرەكانی هۆڵەكان دروست نەبێت، میكانیزمێك دەگرینە بەر.

وتیشی: "وەزارەتی پەروەردە هەماهەنگی لەگەڵ وەزارەتی دارایی كردوە، بەوەی ئەو بانكانەی مووچەی مامۆستایانی ناو شار دابەش دەكەن، دابەشكردنەكەیان لە بەیانیانەوە بگۆڕێت بۆ ئێواران".

بەڕێوبەری پەروەردەی سلێمانی لە لێدوانەكەیدا بۆ خەڵك ڕاشیگەیاند، بەم میكانیزمە كەشی هۆڵی تاقیكردنەوەكان گونجاو دەبێت هەم بۆ مامۆستایان، كە دەتوانن دوای تاقیكردنەوەكان مووچەكەیان وەربگرن، هەم نابیتە گرفت بۆ بەڕێوەبەر و یاریدەدەرەكانی هۆڵًەكان.

ئەوەشی خستەڕوو، ئەگەر وەزارەتی دارایی بڕیاری كۆتایی لەو بارەیەوە بدات، ئەوا ئێوارەی ڕۆژی پێنج شەممە مووچەی مامۆستایانی ناو شار دابەشدەكرێت.

بەپێی بڕیاری وەزارەتی دارایی و ئابووری حكومەتی هەرێم، بڕیارە ڕۆژی چوار شەممە مامۆستایانی دەرەوەی شار و پێنج شەممە مامۆستایانی ناو شار مووچەی مانگی نیسان وەربگرن.


ڕێبین عه‌لی