كادیرێكی یەكێتی: پارتی هەڕەشەی دوو ئیدارەیی لێ كردووین

13/06/2016 - 16:07 بڵاوکراوەتەوە لە هەواڵ/كوردستانی


كوردیو - محمد عمر كانی

كادیرێكی پێشكەوتوی یەكێتی كە ئەندامی مەكتەبی رێكخستنی ئەو حزبەیە ئاشكرای دەكات لە دواهەمین كۆبونەوەی نێوان پارتی و حزبەكەیدا، پارتی هەڕەشەی دوو ئیدارەیی لە یەكێتی كردووە .

سلێمان عەبدوڵا یونس، ئەندامی مەكتەبی رێكخستنی یەكێتی بەناونیشانی (لەدوا كۆبوونەوەدا پارتی چی بەیەكێتی گوت؟) بڵاوی كردۆتەوە: بەگوێرەی زانیاریەكانی ناو كۆبوونەوەكەی ٦/۱۲ كەپارتی‌و یەكێتی ئەنجامیاندا، پارتی گوتویەتی دەبێت یەكێتی ڕێكەوتنەكەی خۆی لەگەڵ گۆڕان هەڵبوشێنێتەوە، ئەگینا دەیكەنەوە بەدوو ئیدارەیی! .

ئەو كادیرەی یەكێتی دەشڵێت: ئامانجی هەڕەشەكانی پارتی لەبنچینەدا بۆ تێكدانی ڕێكەوتنەكە نیە، بەڵكو بۆ گۆڕینی سەرۆكایەتی پەرلەمان‌و مسۆگەركردنی مانەوەی سەرۆكی هەرێمە. ئەگەرنا پارتی باش دەزانێت ئەم داوایەی واقعی نیە، چونكە لەلایەكەوە ناكرێت بارزانی خەونی دەوڵەتی هەبێت‌و پارتەكەشی سیاسەتی دوو ئیدارەیی، لەلایەكەی تریشەوە ئیدی ڕێكەوتنەكە بوو بەدیفاكتۆ!
پارتی مافی خۆیەتی ئەو سەری تونێڵەكە ببینێت، بەڵام مافی نییە ناوەندی تونێڵەكە بگرێت‌و داوا بكات یەكێتی‌و گۆڕان هەریەكەیان بەئاراستەیەكی جیاواز بۆ شوێنی خۆیان پاشەكشێ بكەن، ئەوسا هەموان بەئۆكەی پارتی لەدەرەوەی تونێڵەكە یەكبگرنەوە! .

لە كۆتاییشدا وتویەتیشی: لەڕووی كردەییەوە دۆخی ئێستا بەردەوام دەبێت، هەتا ئەوكاتەی یەكێتی‌و گۆڕان، خۆیان پێشنیاری گۆڕینی سەرۆكی پەرلەمان دەكەن. ئەوەش ئەو شتەیە كەپارتی دەیەوێت، چونكە پارتی دەزانێت گۆڕینی سەرۆكی پەرلەمان، مانای مانەوەی بارزانیە .

م. كانی