سەركردەیەكی پارتی وەڵامی نەوشێروان دەداتەوەو داوا لەیەكێتیش دەكات وەڵامی هەبێت

13/06/2016 - 17:40 بڵاوکراوەتەوە لە هەواڵ/كوردستانی

كوردیو - هەولێر

ئەندامێكی سەركردایەتیی پارتی وەڵامی ڕێكخەری گشتیی گۆڕان دەداتەوە و دەڵێت: “قسەكانی چەواشەكارییەو هەڵخەڵەتاندنی خەڵكیەو تەرازوی هێز لە كوردستان بە نەوشیروان مستەفا تێك ناچێت، دەشڵێت: دەبێت یەكێتی وەڵامی قسەكانی نەوشیروان مستەفا بداتەوە .

نەوشیروان مستەفا، ڕێكخەری گشتیی گۆڕان لەسەر دۆخی هەرێمی كوردستان رایگەیاند: “پارتی‌ بەرپرسیاری یەكەمە لەم دۆخە و ڕێككەوتنەكەی یەكێتی و گۆڕان تەرازووی‌ هێز لە هەرێمی كوردستان دەگۆڕێت”.

لەبەرانبەریشدا نەجات حەسەن، ئەندامی سەركردایەتیی پارتی وەڵامی دەداتەوەو دەڵێت:“ئەوەی نەوشیروان مستەفا باسی كردووە، چەواشەكارییە و هەڵخەڵەتاندنی خەڵكە بە شێوەیەكی دیكە، بەڵام بەبڕوای من، ئیتر خەڵك بڕوایان پێ ناكات، چونكە ئێمە زانیاریی دیكەمان لەناو ڕێكخستنەكانی گۆڕانەوە پێ دەگات كە چەندە خەڵك بێ بڕوابووە بەرانبەر بە نەوشیروان مستەفا”.

ئەو ئەندامەی سەركردایەتیی پارتی بە باس نیوزی نزیك لە حیزبەكەی راگەیاندووە:“كاتێك گۆڕان لەناو حكوومەت بوو و پۆستیان هەبوو، ئەو كاتەش بەرپرسیاریەتییان دەخستە بەردەم پارتی ، خالێكی دیكە ئەوان ڕێككەوتنیان لەگەڵ یەكێتی هەیە، كەچی ئەمڕۆ مەلا بەختیار بەشێوەیكی دیكە لەسەر بابەتەكان قسە دەكات، ئەو دەڵێت پارتی و یەكێتی ئەركێكی قورسیان لەسەر شانە، بۆیە دەبێت یەكێتیش وەڵامی قسەكانی نەوشیروان مستەفا بداتەوە”.

دووپاتیشی كردەوە: “تێناگەین لە نەوشیروان مستەفا، لەلایەكەوە دەڵێت بۆ ئارامیی كوردستان ڕێككەوتن لەگەڵ یەكێتی دەكەین، كەچی لەم لاوە ئەو لێدوانانە دەدات؟ بۆیە وەڵامی نەوشیروان مستەفا بەوە دەدەینەوە كە تەرازوی هێز لە كوردستان بە نەوشیروان مستەفا تێك ناچێت”.