عەلی حەمە ساڵح حەوت خاڵ لەبەردەم مەسعود بارزانی دادەنێت

13/06/2016 - 19:09 بڵاوکراوەتەوە لە هەواڵ/كوردستانی


كوردیو - محمد عمر كانی

دوای ئەوەی مەسعود بارزانی پەیامێكیتری لەسەر گەندەڵی بڵاوكردەوە، پەرلەمانتارێك پەیامێكی ئاراستە دەكات و دەڵێت: من ئامادەم لە ڕێگای دەستەی نەزاهەوە هەموو ئەو فایلانەی دیكەش كە لەبەردەستمە بیدەمە دادگا، هیوادارم ئەو ئاستەنگانە نەهێڵدرێ، كە لەبەردەم كاری دادگادا هەیە.

پەرلەمانتار عەلی حەمە ساڵح، نامەیەكی كراوەی بۆ مەسعود بارزنی نوسیوەو لە لاپەرەكەی خۆی لە تۆڕی كۆمەڵایەتی فەیسبوك بڵاوی كردۆتەوەو چەند بوارێكی خستۆتە بەردەمی بۆ ئەوەی چاكسازی لەسەر بكرێت و دەشڵێت: ئەگەر هاتوو دەست بۆ ئەم دۆسیانە نەبرێت، دۆسییە بچوكەكانی دیكە بەهای ئەوتۆیان نیە.

دەقی نامەكەی عەلی حەمە ساڵح:

بۆ/ كاك مەسعود بارزانی
بابەت/ هاوكاری لە دژایەتی گەندەڵی
لە دوایەمین پەیامتاندا، دەڵێن: با چاكسازی و دژایەتی گەندەڵی لە ململانێ سیاسیەكان دوربخەینەوە، ئێستا دۆخی خراپ و گوزەرانی خەڵك وادەخوازێت چاكسازی ریشەیی بكرێت، منیش پێموایە ململانێی سیاسی دەبێت لە رووبەڕووبونەوەی گەنەدەڵی جیابكرێتەوە.

من ئامادەم لە ڕێگای دەستەی نەزاهەوە هەموو ئەو فایلانەی دیكەش كە لەبەردەستمە بیدەمە دادگا، هیوادارم ئەو ئاستەنگانە نەهێڵدرێ، كە لەبەردەم كاری دادگادا هەیە.

ئێستا چاكسازی پێویستە لەم بوارانەدا بكرێت:
١- لێكۆڵینەوە لە هەموو ئەو پارانەی نەوت كە زیاتر لە ٢٣ ملیار دۆلارەو چووەتە بانكی كوردستان ئەهلی بكرێت و بەشێكی تائێستا خەرجنەكراوە.

٢- لێكۆڵینەوە لەو پارانەی كە لەپێش ٢٠١٤ لە پارەی نەوت بۆ پرۆژە تەرخانكرا، تاوەكو ئێستا بەشێكی زۆری خەرجنەكراوە.

٣- چەندین كۆمپانیا هەن، بەكارمەندی حكومەت كاردەكەن، لە خاڵی سنوری و گەراجەكان و چەند نەخۆشخانە و چەند شوێێنێكی دیكەدا، مانگانە دەیان ملیۆن ملیۆن دۆلاریان دەستدەكەوێت، ئەمە جگە لە قۆرخكارییە گەورەكەی ئەنتەرنێت و تەلیفۆن كە دەست بەسەر دامەزراوەكانی حكومەتیشدا گیراوە.

4-لێكۆڵینەوەمكردووە لەسەرمایەی تەنیا حەوت كۆمپانیاو كەسایەتی نزیك یان مەحسوب لەسەر پارتی دیموكراتی كوردستان، نزیكەی ٢٥ ملیار دۆلاری خەمڵێندراوە، ئەگەر تەنیا ١٥٪ باجی دەخلیان لێوەربگیرێت، دەكاتە ٣ ملیارو ٧٥٠ ملیۆن دۆلار، ئەوكات دەتواندرێت لە سنوری سلێمانیش هەمان كار بكرێت، لەگەڵ سەرمایەدارانی دیكەش هەمان شت ئەنجامبدرێت.

5- لێكۆڵینەوە لەو پارە بكرێت كە هەموو مانگێك وەك داهاتی بەرهەمە نەوتییەكان لە ناوخۆ وەدەست دێت، كە مانگانە١٤٠ ملیۆن دۆلارەو دەچێتە بانكی كوردستانی ئەهلی.

6- لێكۆڵینەوە لەو پارانە بكرێت كە بەناوی كڕینی كاڵاوە براونەتە دەرەوەو نەهێندراونەتەوە، لەهەر سێ ڕێگای بانكی ناوەندی عێراق و نەختینە لە فڕۆكەخانەو خاڵە سنورییەكان، كە چەندین ملیار دۆلارە، بۆ ئەمەش ئیرادە هەبێت دەستكەوتنی بەڵگە ئاسانەو هەیە.

7- مانگانە بڕی نەوتی فرۆشراو بە بۆری و تانكەرو بەكارهێنانی ناوخۆ ئاشكرا بكرێت و نرخی فرۆشتن رابگەیندرێت و لە بانكی حكومەت هەڵبگبرێت و حكومەت بەشێوەی كێبركێ پرۆسەی ئاڵوگۆڕ دراو ئەنجامبدات.

پێموایە بەم هەنگاوە خێرایانە دۆخی كوردستان گۆڕانی گەورەی بەسەر دێت و دواتر دەكرێت چاكسازی لە كۆی سێكتەرەكانی دیكەدا بكرێت.

ئەگەر هاتوو دەست بۆ ئەم دۆسیانە نەبرێت، دۆسییە بچوكەكانی دیكە بەهای ئەوتۆیان نیە.

عەلی حەمە ساڵح
ئەندامی پەرلەمانی كوردستان