پارتی: تەرازوی هێز لەکوردستان بە نەوشیروان مستەفا تێک ناچێت

ڕێبین عەلی 14/06/2016 - 11:38 بڵاوکراوەتەوە لە هەواڵ/كوردستانی

ئەندامێکی سەرکردایەتیی پارتی وەڵامی قسەکانی نەوشیروان مستەفا، دەداتەوە و دەڵێت: تەرازوی هێز لە کوردستان بە نەوشیروان مستەفا تێک ناچێت.

سەبارەت بە وتەكانی نەوشیروان مستەفا رێكخەری گشتی بزوتنەوەی گۆڕان، نەجات حەسەن، ئەندامی سەرکردایەتیی پارتی دیموکراتیی کوردستان، بە میدیاكانی حیزبەكەی ڕاگەیاند: "ئەوەی نەوشیروان مستەفا باسی کردووە، چەواشەکارییە و هەڵخەڵەتاندنی خەڵکە بە شێوەیەکی دیکە، بەڵام بەبڕوای من، ئیتر خەڵک بڕوایان پێ ناکات، چونکە ئێمە زانیاریی دیکەمان لەناو ڕێکخستنەکانی گۆڕانەوە پێ دەگات کە چەندە خەڵک بێ بڕوابووە بەرانبەر بە نەوشیروان مستەفا”.

ئەو ئەندامەی سەرکردایەتیی پارتی ئەوەشی ڕوون کردەوە کە "پارتی بەرپرسیاریەتیی گەورەی لەسەر شانە لە ڕووبەڕووبوونەوەی داعش و پارێزگاریکردن لە سنوورەکانی کوردستان لەگەڵ یەکێتیدا، جگە لەوەی لە ئەرکە نەتەوەییەکانیشدا پارتی هەڵگری بیری نەتەوەیی و گەیاندنی خەڵکی کوردستانە بە لێواری سەربەخۆیی".

وتیشی: "کاتێک گۆڕان لەناو حکوومەت بوو و پۆستیان هەبوو، ئەو کاتەش بەرپرسیاریەتییان دەخستە بەردەم پارتی دیموکراتیی کوردستان، خالێکی دیکە ئەوان ڕێککەوتنیان لەگەڵ یەکێتیی نیشتمانیی کوردستان هەیە، کەچی ئەمڕۆ مەلا بەختیار بەشێوەیکی دیکە لەسەر بابەتەکان قسە دەکات، ئەو دەڵێت پارتی و یەکێتی ئەرکێکی قورسیان لەسەر شانە، بۆیە دەبێت یەکێتیش وەڵامی قسەکانی نەوشیروان مستەفا بداتەوە”. دووپاتیشی کردەوە: "تێناگەین لە نەوشیروان مستەفا، لەلایەکەوە دەڵێت بۆ ئارامیی کوردستان ڕێککەوتن لەگەڵ یەکێتی دەکەین، کەچی لەم لاوە ئەو لێدوانانە دەدات؟ بۆیە وەڵامی نەوشیروان مستەفا بەوە دەدەینەوە کە تەرازوی هێز لە کوردستان بە نەوشیروان مستەفا تێک ناچێت”.

دوێنێ دووشەممە نەوشیروان مستەفا لەكۆبوونەوەیەك له‌گه‌ڵ ده‌سته‌و ڕایه‌ڵه‌ی‌ مه‌كۆكانی‌ سلێمانی‌، هه‌ڵه‌بجه‌، ماوه‌ت، قه‌ره‌داغ، شارباژێر، سۆران، پێنجوێن و سه‌یدسادق رایگەیاند: ڕێكه‌وتنی‌ گۆڕان و یه‌كێتی‌، به‌ڕێگه‌ی‌ مه‌شرو ع‌و قانوونی‌ ته‌رازووی‌ هێز له‌هه‌رێمی‌ كوردستان ده‌گۆڕێت.


ڕێبین عەلی