مامۆستا محمد فرج: ئەگەرچی خۆم و یەكگرتوو زەرەرمەندبووین، بەڵام هەرگیز پەشیمان نیم

14/06/2016 - 18:47 بڵاوکراوەتەوە لە هەواڵ/كوردستانی


كوردیو - هەولێر

كاتژمێر (2)ی پاشنیوەڕۆی ئەمڕۆ ، سێ شەممە (14-6-2016) مامۆستا محەمەد فەرەج ، پێشوازی كرد لە سەردار عەبدوڵا چاودێری سیاسی و ئەندامی خولی پێشووی فراكسیۆنی گۆڕان لە ئەنجومەنی نوێنەرانی عێراق .

لە دیدارێكی دۆستانەدا ، وێڕای شرۆڤەكردنی بارودۆخی سیاسی عێراق و هەرێم و ناوچەكە ، سەردار عەبدوڵا دەستخۆشی و ستایشی خۆی ئاڕاستەی مامۆستا محەمەد كرد كە سەركەوتوانە چوار ساڵی ئەمینداریەتی بەڕێوەبرد بەشێوەیەكی بەرپرسیارانە مامەڵەی كرد و بەو هەڵوێستە مێژووییەی لە كۆنگرە كۆتایی پێهێنا .

ووتیشی: كشانەوەی مامۆستا محەمەد فەرەج لەو تەوقیتەدا بوەهۆی پوچەڵ كردنەوەی هەموو پێشبینی و گریمانەكان كە كەسانێك گرەویان لەسەر دەكرد لەدەرەوەی یەكگرتوو ، هەڵوێستێكی ئەوەنە گەورە و ناوازە بوو كە نەوە لەدوای نەوەی مامۆستا و یەكگرتووەكان شانازی پێوە بكەن .
لەبەشێكی قسەكانیدا سەردار عەبدوڵا وەك چاودێرێكی سیاسی مەوقفی یەكگرتووی لەماوەی ڕابردودا بە مەوقیفێكی هاوسەنگ وەسف كردو ووتی : هەڵوێست و مەواقفی یەكگرتوو متمیز و سەربەرزانەیە و خەڵكی زۆری ماوە وەك خۆی لەو مەوقیفانە حاڵی بێت ، ڕایگەیاند: یەكگرتوو توانی لە نێوان تاكڕەوی و عینادیدا ڕێگەی سێیەم و تەوەجوهی سێیەمی هەبێ و نەچێتە ژێر ئەجێندای هیچ لایەكی هاوكێشەكە ، بەمەش توانی تاڕادەیەكی باش هەرێم لە دوو كەرت بوون بپارێزێت و لەمیانەیەدا یەكگرتوو لێپرسراوانە ڕەفتای كرد .

تایبەت بە مامۆستا محەمەد فەرەج ، پاش تەواوبوونی پۆستی ئەمینداری ڕایگەیاند : ڕۆڵی مامۆستا لە ئێستاوە دەست پێ دەكات چاوەڕێی كاری گەورە و مبادەرەی جوانی لێ دەكرێت .

لای خۆیەوە مامۆستا محەمەد فەرەج ، سەبارەت بە دۆخی هەرێم ووتی : لە ڕەفتار و گوفتار و هەڵوێستەكاندا زۆر گرنگە لە بازنەی بچوك بێینە دەرەوە و بچینە بازنەیەكی گەورەتر بۆئەوەی بتوانین هەناسەیەكی قووڵ بدەین ، دیارە ئەوەی هەناسەی قووڵی هەبێ هەرگیز توند و توڕە ونابێ لە ڕوداو و پێشهاتەكان.

ڕاشیگەیاند: بەداخەوە هۆكاری زۆرێك لە كێشەو ئەزمەكان شتی نەفسی و شەخسیە ، ئاشكراشە هەمیشە نەفس نیزاع و ململانێ بەرهەم دەهێنێ بە پیچەوانەی عەقڵەوە كە بەرهەمهێنەری قانون و ریكەوتن و ریگا چارەی سەلامەتە.

سەبارەت بە چارەسەری ئەم دۆخە چەقبەستوەی هەرێم ، دوپاتی كردەوە ئەگەرچی لە ڕابردودا بەهۆی سازانەوە بەپلەی یەكەم خۆم دواتر یەكگرتوو زەرەمەندبووین ، بەڵام هەرگیز لێی پەشیمان نیم چونكە ئەو مەبدەئێكی جێگیرە لام كە جگە لەسازان و ڕێكەوتن هیچ ڕێگاچارەیەكی دیكە نیە كە بتوانی بە ئاشتیانە ئەم دۆخە چارە بكات و لای من سەقامگیری و ئاشتی كۆمەڵایەتی لە پێش هەموو شتێكی دیكەوەیە لەم هەریمەی ئیمەدا.

م. كانی