پارەیەکی زۆر ڕەوانەی بانکەکان کرا..دابەشکردنی موچە دەستیپێکرد

ڕێبین عەلی 26/06/2016 - 11:06 بڵاوکراوەتەوە لە هەواڵ/كوردستانی


دابەشكردنی موچەی مانگی ئایاری ٢٠١٦ی فەرمانبەران دەستیپێكردەوەو بەڕێوەبەری یەكێك لەبانكەكانیش دڵنیایی دەداتە فەرمانبەران و ڕایدەگەیەنێت، "پارەیەكی زۆر ڕەوانەی بانك كراوەو تا جەژنی ڕەمەزانیش كۆتایی بەدابەشكردنی موچەی مانگی ئایار (مانگی پێنج) دەھێندرێت".
دوێنێ ٢٥ی حوزەیرانی ٢٠١٦، لەڕاگەیەندراوێكدا وەزارەتی دارایی و ئابوری ڕایگەیاند، ئەمڕۆ یەكشەممە موچەی (مانگی ئایار ـ مانگی پێنج)ی ١٢ وەزارەت و دەستەی حكومەتی ھەرێم دابەشدەكرێت.
سالار غەریب بەڕێوەبەری بانكی ئاشتیی لەسلێمانی دڵنیاییدا لەبونی پارە لەبانكەكاندا بۆ موچەی فەرمانبەران و وتی:"دوای ئەوەی وەزارەتی دارایی دابەشكردنی موچەی ژمارەیەك وەزارەت و دەستەی ڕاگەیاند، پارەیەكی زۆری ڕەوانەی بانك كراوە.
بەڕێوەبەری بانكی ئاشتیی ئەوەشی ڕونكردەوە، لەئێستاشدا دەستیان بەدابەشكردنی موچەی ئەو وەزارەت و دامودەزگایانە كردوە كە ناویان لەڕاگەیەنراوەكەدا ھاتوە.
لەبارەی كێشەی نەبونی سیولەش لەبانكەكان سالار غەریب دوبارە دڵنیاییداو وتی:"ئەمڕۆ موچەی سەرجەم ئەو شوێنانە دابەشدەكرێت كە ناویان ھاتوە، چونكە پارەیەكی زۆر لەلایەن وەزارەتی داراییەوە نێردراوە".
سەبارەت بەموچەی ئەو وەزارەت و دامودەزگایانەشی كە تائێستا وادەی دابەشكردنی موچەكانیان ڕانەگەیەندراوە، سالار غەریب وتی:"دابەشكردنی موچە بەردەوامدەبێت و تا جەژنی ڕەمەزانیش كۆتایی بەدابەشكردنی موچەی مانگی ئایاری سەرجەم فەرمانبەران دەھێندرێت".

 

تۆڕی سلێمانی


ڕێبین عەلی