وەزیری پەروەردە چەند دەزگایەكی ڕاگەیاندن دەداتە دادگا

30/06/2016 - 11:34 بڵاوکراوەتەوە لە هەواڵ/كوردستانی


سەرۆكی لیژنەی پەروەردە و خوێندنی باڵا لە پەرلەمانی كوردستان ڕایدەگەیەنێت لە پرسی دزەكردنی پرسیاری تاقیكردنەوەكانی پۆلی 12ی ئامادەییدا هەندێك كەناڵ ڕۆڵی خراپیان گێڕا و بەوهۆیەوە سكاڵایان لەسەر تۆمار كراوە.

ئیبراهیم سمۆ ، سەرۆكی لیژنەی پەروەردە و خوێندنی باڵا لە پەرلەمان بە ماڵپەڕی فەرمی پارتی ڕاگەیاندووە ''ئەوانەی بە تۆمەتی دزینی پرسیاری ئەزموونەكان گیراون، لێكۆڵینەوە لەگەڵیاندا بەردەوامە و لە كۆبوونەوەی ئەمڕۆیشدا داوامان كردووە، لایەنە پەیوەندیدارەكان بەپێی یاسا مامەڵەیان لەگەڵدا بكەن و ئەوانەی كە ئەو كارەیان كردووە پێویستە بە سزای یاسایی خۆیان بگەن.''

سەرۆكی لیژنەی پەروەردە و خوێندنی باڵا لە پەرلەمانی كوردستان جەختیشی كردەوە كە: ''دزینی پرسیارەكان ھیچ كاریگەری لەسەر ئەزموونەكان نەبووە، لەبەر ئەوەی ئەو حاڵەتە تەنھا لە كوردستان نییە، بەڵكو بەھۆی پێشكەوتنی تەكنۆلۆژیاوە لێرەولەوێ ھەر ڕوو دەدەن و لە زۆر وڵاتی دیكەش ڕووی داوە، كۆریا و یابان و جەزائیر و ئەمەریكا وەك نموونە، هەڵبەتە ئەوانی وا كارێكیان كردووە، كەسانی نەفس نزمن و لای ئێمە مردوون.''


ئەو دەلێت ، راگەیاندن ئەو كارەی گەورە كرد؛ ڕاستییەكەی كاریگەری خستە سەر باری دەروونیی قوتابیان، ئەگەرنا لە ڕووی بەسەركەوتوویی ئەنجامدانی كۆی تاقیكردنەوەكان كاریگەریی نەبووە، جا بۆیە سكاڵای یاسایی لەسەر ئەو كەناڵانە تۆمار كراوە كە ڕۆڵیان لە نیگەرانكردنی قوتابیاندا بینیوە.''

 

 

am