سكاڵا لەسەر نێچیرڤان بارزانی تۆمار كرا

25/07/2016 - 18:24 بڵاوکراوەتەوە لە هەواڵ/كوردستانی

 

كوردیو - هەولێر

دوای ئەوەی سەرۆكی ئەنجومەنی وەزیران لەسەر نیو مووچەی مامۆستایان ڕایگەیاند: لە ئێستادا دابەش ناكرێت، لە بەرامبەردا مامۆستایانی سلێمانی سكاڵای یاسایی لەسەر تۆمار دەكەن .

 
ئەمرۆ دووشەممە 25 ی تەمووزی 2016 ژمارەیەك لە مامۆستایانی شاری سلێمانی سكاڵایان لەسەر نێچیرڤان بارزانی سەرۆكی ئەنجومەنی وەزیران تۆمار كرد وەك ناڕەزاییەك بەرامبەر بە نەهێنانەدی بەڵێنەكانی بۆ دابەشكردنی مووچەكانیان و نیو مووچەی مانگی 9ی ساڵی رابردوو .
 
سكاڵاكە لەلایەن گرووپی مامۆستایانی ناڕازی تۆماركراوەو ئەمرۆش لە گردبونەوەیەكدا لەبەردەم دادگای سلێمانی ناڕەزاییان دەربڕی و یاداشتێكیان ئاراستەی داواكاری گشتیش كرد .
 
بەپێی سكاڵاكە هەریەكە لە وەزارەتەكانی پەروەردەو داراییش ناویان هاتوەو مەبەستیش لە سكاڵاكە بەجێنەگەیاندنی بەڵێنەكانیان بووە بۆ پێدانی مووچە بە مامۆستایان .
 
ساڵی رابردوو مامۆستایان لە مانگی 9دا تەنها نیومووچەیان وەرگرت و دوای ئەوە چەندین جار لەلایەن سەرۆكی حكومەت و وەزارەتی پەروەردەو وەزارەتی دارایی بەڵێنی پێدانی نیو مووچەكەیتریان پێدرا، لە دواهەمین جاریش مانگی رابردووبوو كە نێچیرڤان بارزانی بەڵینی پێدانەوە كە نیو مووچەكە دابەش بكەن بەسەریان ، بەڵام تا ئێستا مامۆستایان نە نیو مووچەكەی ساڵی رابردوویان پێ دراوە نە مووچەی مانگی شەشیشیان وەرگرتووە .
 
 
م. كانی