ئەندامێكی ئەنجومەنی پارێزگای سلێمانی: ڕۆژنامەنووسان لە ڕەوشێكی خراپدا كاری ڕۆژنامەوانی دەكەن

15/08/2016 - 13:07 بڵاوکراوەتەوە لە هەواڵ/كوردستانی

كوردیو ـ هەڵەبجە ـ حەیدەر حەمە صاڵح
سەر لە بەیانی ئەمڕۆ لە میانی بەشداری كردنی لە گردبونەوەیەكی ژمارەیەك لە ڕۆژنامەنووسانی هەڵەبجەدا بە بۆنەی تیرۆكردنی ڕۆژنامەنوسەكەی دهۆكەوە، ئەندامێكی ئەنجومەی پارێزگای سلێمانی ڕایگەیاند: ڕۆژنامەنووسان لە ڕەوشێكی خراپدا مومارەسەی كاری ڕۆژنامەوانی دەكەن .

 

خەدیجە عەبدول جەبار ئەندامی ئەنجومەنی پارێزگای سلێمانی لەلیستی خزمەت و پشكی یەكگرتوو لە لێدوانێكی دا بۆ كوردیو ڕایگەیاند: تیرۆر كردنی ڕۆژنامەنوسان مەترسیەكەی زۆر گەورەیە بە بەراورد بە بابەتەكانی دیكە ، لەبەر ئەوەی ئەم جۆرە تیرۆرانە پەیامی تێدایە و ئەم دەسەڵاتە دەیەوێت هاوڵاتیان بێدەنگ بكات ،لەبەرانبەر دا هیچ واتایەك هەڵناگرێت جگە لەوەی كە دەیەوێ‌ برەو بدات بە دەسەڵاتێك كە دەسەڵاتێكی تاك ڕەوی بێت .

 

هەروەها ڕاشیگەیاند: دەسەڵات دەیەوێت هاوڵاتیان و ڕۆژنامەنوسان بێدەنگ كات بۆیە ئیدانەكردنی ئەم جۆرە كارانە ئەركی سەرشانی هەموو تاكێكی كۆمەڵگەیە ،دەبینین كاری تیرۆر كردنی ڕۆژنامەنوسان زیادی كردوە كە ئاماژەیە بۆ بێدەنگ كردنی ڕۆژنامەنوس كە نەتوانن بە ئەركی خۆیان هەستن ، پێویستە هاوڵاتیان بەرگریكارێكی باش بن لە ڕۆژنامەنوسان ئەمە جگە لەسەندیكاكانی خۆیان .

 

ئەو ئەندامەی ئەنجومەنی پارێزگای سلێمانی ئەوەشی خستە ڕوو: بەم هەنگاوانەی دەسەڵات دەیەوێت برەو بەدەسەڵاتی ئیستیبدادی بدات ،لەلایەكی دیكەوە هۆكارەكەی ئەوەیە لەڕابردودا نەتوانراوە بكوژانی ڕۆژنامەنوسان بە سزای یاسایی خۆیان بگەیەنرێن بۆیە دەبینین تیرۆری ڕۆژنامەنوسان لە زیادبوندایە لەكاتێدا دەسەڵاتە ئەمنیەكانی هەرێم و لایەنە پەیوەندی دارەكان بكوژەكان دەستگیر بكەن بۆیە دەبێت فشارەكان بەردەوام بن و داواكاری گشتی بێتە سەرخەت ،بەداخەوە دەبینین لەهەرێمی كوردستان دا ڕۆژنامەنووسان لە ڕەوشێكی خراپدا كاری ڕۆژنامەوانی دەكەن .

 

لە چەند ڕۆژی ڕابردودا ڕۆژنامە نوسێكی ئاژانسی ڕۆژ نیوز بەناوی (وەدات حسین) لە شاری دهۆك هێرشی كرایە سەر و تیرۆر كرا و كاردانەوەی زۆری میدیایی بە دوای خۆیدا هی!َناو لەزۆربەی شارەكانی هەرێمدا ئەو هێرشە ئیدانە كرا .

 

 

 

سەلام بێستانسوری