جڤاتی نیشتیمانی گۆڕان ڕەزامەندی نواندووە لەسەر مانەوەی پارێزگاری سلێمانی و هەڵەبجە لەپۆستەكانیاندا

15/08/2016 - 13:52 بڵاوکراوەتەوە لە هەواڵ/كوردستانی


كوردیو ـ تایبەت


دوای چەند ڕۆژێكی كەمی داهاتوو، كۆتایی بەوادەی ئاڵوگۆڕی پۆستەكانی پارێزگاری سلێمانی و هەڵەبجە لە نێوان یەكێتی و گۆڕان بە پێی ڕێكەوتنی نێوانیان، دوای پێشنیاری سەركردایەتی هاوبەشی یەكێتی و گۆڕان بۆ مانەوەی هەریەكە لە پارێزگارەكانی هەڵەبجە و سلێمانی لە پۆستەكانی ئێستایان، جڤاتی نیشتیمانی بزوتنەوەی گۆڕانیش ڕەزامەندی لەسەر پێشنیارەكە دەڕبڕیوە.


بە گوێرەی زانیاریەكانی كوردیو ڕۆژی پێنج شەممە ی ڕابردوو، جڤاتی نیشتیمانی بزوتنەوەی گۆڕان لە دانیشتنێكی تایبەتدا باس لە پرسی ڕێكەوتنی پێشوەختی نێوانیان كراوە لەگەڵ یەكێتی سەبارەت بە پۆستەكانی پارێزگای سلێمانی و هەڵەبجە و بە تێكڕای دەنگ ڕەزامەندی دراوە لەسەر پێشنیاری سەركردایەتی هاوبەشی یەكێتی و گۆڕان بۆ ڕێكەوتنەكە.


بە گوێرەی پێشنیارەكەی سەركردایەتیە هاوبەشەكە كە دوای ڕێكەوتنە سیاسیەكەی نێوان گۆڕان و یەكێتی پێكهێنراوە، داوای كردووە ڕێكەوتنەكە وەك خۆی بمێنێتەوە واتە هەریەكە لە ئاسۆ فەرەیدوون پارێزگاری سلێمانی لەسەر پشكی یەكێتی و هەڤاڵ ئەبوبەكر سەرۆكی ئەنجومەنی پارێزگا لەسەر پكشی گۆڕان لە پۆستەكانی ئێستایان بمێننەوە، هەروەك عەبدوڵا نەوڕۆڵی پارێزگاری هەڵەبجە لەسەر پشكی گۆڕان لە پۆستەكەیدا بمێنێتەوە.


جێگای ئاماژە بۆكردنە بڕیارە لە 20ی ئەم مانگەدا كۆتایی بە وادەی ئاڵوگۆرۆِی پۆستەكانی نێوان یەكێتی و گۆڕان لە سلێمانی و هەڵەبجە كۆتایی پێ بێت و ڕۆژی ڕابردووش ئاسۆ فەرەیدون پارێزگاری سلێمانی بە فەرمی ئامادەیی خۆی ڕاگەیاند بۆ دەست بەرداربوونی لە پۆستەكەی.

 لەگەڵ ئەوەی تاوەكو ئێستا بە فەرمی یەكلابونەوەی ئەو پرسە ڕانەگەیەنراوە، بەڵام چەندین بەرپرسی بزوتنەوەی گۆڕان جەخت لە جێبەجێكردنی ڕێكەوتنەكە و وەرگرتنەوەی پۆستی پارێزگاری سلێمانی دەكەن.