عەقید تاهیر بەهائەددین: لە ٨ هەزار پێشمەرگەی رۆژ ، ٤٠ شەهید و٢٠٠ بریندارمان هەیە

18/08/2016 - 11:30 بڵاوکراوەتەوە لە هەواڵ/كوردستانی

 

فەرماندەی پێشمەرگەی رۆژ رایدەگەیەنێت: رێگرییەکانی هێزە چەكدارەكان نەبێت، سبەی دەگەڕێیننەوە بۆ سووریا و تەواوی شارە کوردییەکان دەپارێزین.

فەرماندەی پێشمەرگەی رۆژ، عەقید تاهیر بەهائەددین راگەیاند: کۆی گشتی پێشمەرگەی رۆژ هەشت هەزار پێشمەرگە دەبێت، چوار هەزار پێشمەرگە مەشق و راهێنانی سەربازییان تەواو کردووە و لە ئەرکی پێشمەرگایەتی خۆیانن لە میحوەرەکانی سنووری هەرێمی کوردستان و هاووڵاتییانی رۆژئاوا بەردەوامن لە خۆناونووسکردن بەمەبەستی پەیوەندیکردن بە ریزەکانی پێشمەرگەی رۆژ.
عەقید تاهیر بەهائەددین لە لێدوانێکدا لەبارەی ئەرکی سەربازی هێزەکانی پێشمەرگەی رۆژ گوتی: دوای تەواوکردنی مەشق و راهێنانی سەربازی و نەبوونی رێگە تاوەکو بگەڕێننەوە بۆ رۆژئاوا، پێشمەرگەکانی رۆژ شان بە شانی پێشمەرگەکانی هەرێمی کوردستان لە میحوەرەکانی پێشمەرگە لە سنووری هەرێمی کوردستان بە تایبەت لە سنووری پارێزگای دهۆک رۆڵی پێشمەرگایەتی دەبینن و لە ئۆپەراسیۆنەکانیش بەشدارییان کردووە و بەشداری دەکەن.
ناوبراو سەبارەت بە ئاماری شەهید و بریندارانی پێشمەرگەی رۆژ گوتی: لەبەر ئەوەی پێشمەرگەکانی رۆژ بەشدارییەکی بەرچاوییان هەبووە لە ئۆپەراسیۆنەکان و کۆنترۆڵکردنەوەی ناوچەکانی ژێر قەڵەمڕەوی تیرۆریستانی داعش، هاوشێوەی پێشمەرگەی هەرێمی کوردستان پێشمەرگەی رۆژیش شەهید و برینداری هەبووە، تا ئێستا لە کۆی بەشدارییەکانی پێشمەرگەی رۆژ لە ئۆپەراسیۆنەکانی هێزی پێشمەرگە لە هەرێمی کوردستان، زیاتر لە ٤٠ شەهید ٢٠٠ بریندارمان هەبووە.
عەقید تاهیر بەهائەددین باسی بەشداری پێشمەرگەی رۆژ دەکات لە دوایین ئۆپەراسیۆنی هێزەکانی پێشمەرگە لە میحوەرەکانی خازر – گوێڕ دژی چەکدارانی داعش و دەڵێت: لە ئۆپەراسیۆنی چەند رۆژ لەمەوبەری هێزەکانی پێشمەرگە بۆسەر تیرۆریستانی داعش لە میحوەرەکانی خازر – گوێڕ پێشمەرگەی رۆژ بەشدارییەکی قارەمانانەیان کرد و رۆڵیان هەبوو لە کۆنترۆڵکردنەوەی ئەو گوندانەی لە ناو پلانی ئۆپەراسیۆنەکەدا هەبوو و لە ئۆپەراسیۆنەکانی پێشمەرگە دژی داعش چوار پێشمەرگەی رۆژ شەهید بوون و ١٠ی دیکەیش بریندار بوون.
سەبارەت بە رێژە و رۆڵی ئافرەت لە ناو هێزی پێشمەرگەی رۆژدا ئەو فەرماندەیەی هێزەکانی پێشمەرگەی رۆژ دەشڵێت: ئافرەت لە ناو هێزەکانی پێشمەرگەی رۆژ رۆڵێکی ئەرینی باش دەبینن جگە لەوەی بە وورەیەکی بەرزەوە بەشداری لە کۆنترۆڵکردنەوەی ناوچەکانی سەربە هەرێمی کوردستان دەکەن هەرچەند پێشمەرگە خاوەن وورەیەکی بەرزە، بەڵام پێشمەرگە ئافرەتەکان وورە دەبەخشنە هێزەکانی دیکەی پێشمەرگەیش لە بەرەکانی شەڕ دژی تیرۆرستانی داعش. ڕێژەی هەرە زۆری پێشمەرگەی رۆژ پیاون نزیکەی ١٥% لە پێشمەرگەی رۆژ ئافرەتن.
لەبارەی شوێن و چۆنیەتی مەشق و راهێنانە سەربازییەکانەوە ناوبراو گوتی: هێزەکانی پێشمەرگەی رۆژ لە سەربازگەکانی ھەولێر، زاخۆ و شێخان لە هەرێمی کوردستان رادەهێندرێن و مەشقی سەربازی ئەنجام دەدەن و لەسەر هەموو جۆرە چەک و تەقەمەنیەک و شەڕی کۆڵان بە کۆڵان و چۆنیەتی هێرش بردن و بەرگریکردن رادەهێندرێن لەلایەن فەرماندە باڵاکانی فەرماندەیی زێڕەڤانی و ناوە ناوە تیـمی راهێنەرە بیانییەکانیش بەشداری دەکەن لە مەشق و راهێنانی پێشمەرگەی رۆژ.
ئەو فەرماندەی پێشمەرگەی رۆژ بە نیگەرانییەوە باسی گەڕانەوەیان بۆ رۆژئاوا دەکات و دەڵێت: ئامانج لە دامەزراندنی هێزەکانی پێشمەرگەی رۆژ لە ساڵی ٢٠١٢وە تا ئێستا پاراستی هاووڵاتییانمانە لە رۆژئاوا، بەڵام بەداخەوە هێزە چەكدارەكان رێگرن لە گەڕانەوەمان، ئێمەیش نامانەوێت شەڕ و ئالۆزی بکەوێتە نێوان هێزە کوردییەکان لە سووریا، ئەگەر مەترسی شەڕی برا کوژی لە پەکەکە لە ئارادا نەبێت و پەکەکە رێگری نەکات بەیانی سەرجەم هێزەکانمان دەگەڕێیننەوە کوردستانی سووریا و تەواوی شارە کوردییان دەپارێزین.
فەرماندەی پێشمەرگەی رۆژ، عەقید تاهیر لە کۆتاییدا ئەوەیشی گوت: ئەو کەسانەی ئەندامن لە هێزەکانی پێشمەرگەی رۆژ سەرجەمیان هاووڵاتییانی کوردی سووریان دوای ئالۆزییەکانی سووریا لە سەرەتاکانی ساڵی ٢٠١٢ بە پەنابەرانی روویان لە هەرێمی کوردستان کردووە و لە دوای دامەزراندنی هێزەکانی پێشمەرگەی رۆژ تا ئێستاشی لەگەڵدا بێت پەنابەرانی کوردانی سووریا بە گەرمی روو لەو هێزە دەکەن و خۆیان ناو نووس دەکەن بۆ ئەندام بوون لە هێزەکانی پێشمەرگەی ڕۆژ.
هێزەکانی پێشمەرگەی رۆژ لە ١٢/٣/٢٠١٢ دامەزراوە و لە کوردانی سووریا پێکهاتووە لە ناو هێزەکەدا هەردوو رەگەزی نێر و مێ هەیە. لە سێ کەمپی سەربازی مەشق و راهێنانیان پێ دەکریت، تا ئێستا لەلایەن فەرماندەیی زێڕەڤانی یازدەمین خولی سەربازی بەسەرکەوتوویی تەواو بووە.

ش.م