تاوەكو ئێستا تەنها بەشە نەوتی ناوچە شاخاوییەكان گەیشتۆتە سلێمانی

20/08/2016 - 10:58 بڵاوکراوەتەوە لە هەواڵ/كوردستانی

بە گوێرەی ئەو زانیاریانەی كە دەست كوردیو كەوتوە تاوەكو ئێستا نزیكەی پێنج ملیۆن لیتر نەوتی سپی گەیشتۆتە سلێمانی و ئەمەش بەشی هەموهاوڵاتیانی پارێزگاكە ناكات و ڕەوانەی ناوچە شاخاویەكان دەكرێت.

 

دوای ئەوەی وەزارەتی سامانە سروشتیەكان ڕایگەیاند پێویستە پارێزگاكان نەوتی سپی بۆ هاوڵاتیان دابین بكەن و چیتر وەك ساڵانی پێشوو نەوتی سپی دابین ناكات، پارێزگاری سلێمانی لە چەند هەولێكیدا توانیویەتی تەنها بەشی ناوچە شاخاویەكان نەوتی سپی دابین بكات و تاوەكو ئێستا تەنها نزیكەی پێنج ملیۆن لیتر نەوتی سپی گەیشتۆتە پارێزگای سلێمانی و ئەوەش بەشی ناوچە شاخاوییەكان دەكات، پارێزگای سلێمانی پێویستی بە زیاتر لە 100 ملیۆن لیتر نەوت هەیە تاوەكو بتوانێت بەشە نەوتی سەرجەم هاوڵاتیانی دابین بكات.

 

جێگای ئاماژە بۆ كردنە لە 10ی حوزەیران ئاسۆ فەرەیدون پارێزگاری سلێمانی سەردانی بەغدادی كرد و ئەمەش نیگەرانی بەشێك لە لایەنە سیاسیەكانی هەرێمی كوردستانی لێكەوتەوە و دواتر ناوبراو ڕایگەیاند كە بەمەبەستی دابین كردنی نەوتی سپی و چەند تەورێكی دیكە سەردانی بەغدادی كردووە.

 

 

سەلام بێستانسوری