دەزگای زانایان وزانستە شەرعیەكانی یەكگرتوو، پەیامێكی پیرۆزبای ئاراستەی مسوڵمانان دەكات

10/12/2016 - 10:37 بڵاوکراوەتەوە لە هەواڵ/كوردستانی

 

كوردیو - سلێمانی

 

دەزگای زانایان وزانستە شەرعیەكانی یەكگرتووی ئیسلامی كوردستان پەیامێكی پیرۆزبای بە بۆنەی یادی لە دایك بوونی سەروەری مرۆڤایەتی (محمد) ( صل الله علیە وسلم) ئاراستەی مسوڵمانان دەكات كە تێیدا هاتووە:" لەكاتێكدا سەر زەوی نوقم بوو لەناو زەلكاوی ستەمكاران و، تاریكستانی ڕەشماڵی بەسەر گۆی زەویدا هەڵدا بوو، كەرامەتی مرۆڤــ بێ بەهاكرابوو، مافی ژیان تەنیا بۆ دەسەڵاتدارو خاوەن پارەو موڵك وداراییەكان بوو، زۆرینەی مرۆڤــ كۆیلەبون بۆ كەمینەیەك، هاوارو ناڵەی بەشخوراو وماف پێشێلكراوان جیهانی پڕ كردبوو، زۆرینەی ئافرەت یان مافی ژیانی نەبوو یان بەكەنیزەك دەكران، لەم هەلومەرجەدا ولەبەهاری 571ی میلادیدا موحەممەدی كوڕی عەبدوڵڵا كۆتا پێغەمبەری مرۆڤایەتی لەدایك بوو".

 

 

دەقی پەیامەكەی دەزگای زانایان وزانستە شەرعیەكانی یەكگرتووی ئیسلامی كوردستان:-

بسم الله الرّحمن الرّحیم
[ ۆمَا أرْسَلْناكَ إلاّ رَحْمَەً لِلْعاڵمیِن ]
جەماوەری ئیسلام پەروەری كوردستان!
زانایانی سەربڵندو عەلەمدارانی مینبەری پێغەمبەری پێشەوا!
سڵاوی خوای گەورەتان لێ بێت.
لەكاتێكدا سەر زەوی نوقم بوو لەناو زەلكاوی ستەمكاران و، تاریكستانی ڕەشماڵی بەسەر گۆی زەویدا هەڵدا بوو، كەرامەتی مرۆڤــ بێ بەهاكرابوو، مافی ژیان تەنیا بۆ دەسەڵاتدارو خاوەن پارەو موڵك وداراییەكان بوو، زۆرینەی مرۆڤــ كۆیلەبون بۆ كەمینەیەك، هاوارو ناڵەی بەشخوراو وماف پێشێلكراوان جیهانی پڕ كردبوو، زۆرینەی ئافرەت یان مافی ژیانی نەبوو یان بەكەنیزەك دەكران.
لەم هەلومەرجەدا ولەبەهاری 571ی میلادیدا موحەممەدی كوڕی عەبدوڵڵا كۆتا پێغەمبەری مرۆڤایەتی لەدایك بوو، ژیان جارێكی تر بوژایەوە، خۆری ڕەحمەت ومیهرەبانی لەئاسۆوە سەری هەڵدا، بونەوەر مونەووەر بوو، شاڕێگەی بەختەوەری خۆی گەیاندە چوارقوڕنەی دنیا، دەرگای ئاسمانەكان كرانەوە وفریشتەكانیش پەیامی ئاشتی ومژدەی دڵخۆشیان بۆ سەر زەوی پەخش دەكرد و بەردەوامە تائەبەد.
لێرەوە بەناوی دەزگای زانایان و زانستەشەرعیەكانەوە گەرمترین پیرۆزبایی ئاراستەی تەواوی موسوڵمانانی جیهان و كوردستان بەتایبەتی دەكەین.
ئەم یادە شكۆدارە بەدەرفەت دەزانین بۆ جەخت كردنەوە لەسەر ئەم خاڵانەی خوارەوە:
(1) بەخۆداچونەوە لەخۆشەویستی و وەفاداری بۆ ڕێبازو بەرنامەكەی و خوێندنەوەی نوێ بۆ سیرەت و تێگەیشتنی دروست لەفەرمودە سەنگینەكانی.
(2) ئاوڕدانەوە لەهەژارو نەدارو بێدەرامەتەكان.
(3) پەیڕەوكردنی دادپەروەری و ڕەتكردنەوەی هەموو جۆرە ستەم و نادادیەك.
(4) داواكارین ئەم یادە ببێتە هەوێنی پێكەوە ژیانی ئاشتیانەی لایەنە سیاسیەكان و، هەنگاونان بۆ كاراكردنەوەی پەڕلەمان وحكومەت و گێڕانەوەی موچەو قوتی زەوت كراوی هاوڵاتیانی بەش مەینەتی ئەم كوردستانە ئازیزە.
لەكۆتاییدا خوازیارین ئەم یادی لەدایك بوونە ببێتە گوڕوتینێك بۆ زیاتر پابەندبوون بەپەیام و ڕەوشتەكانی ئەو پێغەمبەرە سەردارەو بەئاگاهاتنەوە وهەستانەوەی ئوممەتی ئیسلامی بۆ عەلەمداری دادپەروەری وڕاماڵینی ستەم و گەندەڵی و پەخشكردنەوەی بەهاباڵاكان.
جارێكی تر پیرۆزبایی ئەم یادە شكۆدارە لەجەماوەری موسوڵمان و تەواوی زانایانی سەربەرز دەكەین.

دەزگای زانایان وزانستەشەرعیەكانی

یەكگرتووی ئیسلامی كوردستان
11/ربیع اڵاول/1438هــ
10/12/2016