ناوی شەهیدەکانی تەقینەوەکانی کۆیە بڵاوكرایه‌وه‌

21/12/2016 - 02:37 بڵاوکراوەتەوە لە هەواڵ/كوردستانی

حیزبی دیموکراتی کوردستان حدک له‌باره‌ی تەقینەوەکانی بەردەم دەفتەری سیاسی ئەو حیزبە راگەیێندراوێکی بڵاودەکرده‌وه‌ رایدەگەیێنێت: "بەهۆی ئەم تەقینەوەیە بە داخەوە 6 کەس گیانیان لە دەست دا‌و 4 کەسیش بریندار بوون".

له‌راگه‌یه‌نراوێكدا حیزبی دیموکراتی کوردستان حدک رایگه‌یاند :تەقینەوەی تیرۆریستی لە نزیک یەکێک لە بنکەکانی دەفتەری سیاسیی حیزب، شەهیدو برینداربوونی ژمارەیەک لە تێکۆشەرانی حیزبی دیموکراتی کوردستانی لێ کەوتەوە.

ئاماژه‌ی به‌وه‌ش كردووه‌ : ئەمشەو ١٩ لە سەر ٢٠ی دیسامبر (شەوی یەلدا)، دەوروبەری کاتژمێر١٠ی شەو لە کاتێک دا بەشدارانی ڕێورەسمی یادی لە دایکبوونی د.قاسملوو، بە دوای کۆتایی بەرنامەکە بۆ ماڵەکانیان دەگەڕانەوە، دوو تەقینەوەی بە دوای یەک لە نزیک پرسگەی بەر دەرکی قەڵای دیموکرات ڕوویان دا. بە هۆی ئەم تەقینەوەیە بە داخەوە 6 کەس گیانیان لە دەست دا‌و 4 کەسیش بریندار بوون.

هه‌ر له‌راگه‌یه‌نراوه‌كه‌دا ناوی شه‌هیده‌كانی بڵاوكردۆته‌وه‌ بریتین لە:

1- عەلی قۆیتاسی، کادری حیزب

2- وەهاب میر خزری، پێشمەرگەی حیزب

3- سالار باقری، پێشمەرگەی حیزب

4- ئەرسەلان عەباس نیا، پێشمەرگەی حیزب

5- ناسر کەریمی، ئەندامی یەکیەتیی لاوانی دیموکرات

6- عەدنان عەبدوڵلا، مفەوەزی ئاسایش

هه‌ر له‌راگه‌یه‌نراوه‌كه‌دا هاتووه‌ :بە هۆی ئەم ڕووداوەوە دوو پێشمەرگەی حیزب و هەر وەها دوو پۆلیسی ئاسایشیش بریندار بوون.

ئاماژه‌ی به‌وه‌ش داوه‌ :وێڕای مەحکوومکردنی ئەو کردەوە تیرۆریستییە و هەر وەها سەرەخۆشی‌و هاودەردیی قووڵمان لە گەڵ بنەماڵەی شەهیدانی ئەو ڕووداوەو هیوای هەر چی زووتر چاکبوونەوە بۆ بریندارەکان، ڕادەگەیەنین کە لێکۆڵینەوە لە سەر چۆنیەتیی ڕووداوەکە بەردەوامە‌و، ئاسایش‌و دەزگا پێوەندیدارەکان لە شوێنی رووداوەکە حوزووریان هەیە.

له‌كۆتایی راگه‌یه‌نراوه‌كه‌دا هاتووه‌ :زانیاریی زیاتر لە راگەیەندراوەکانی داهاتوو دا بە ئاگاداریی بیرورای گشتی دەگەیەنین.

 

 

هونه‌ر بانه‌گوڵانی