سكرتێری ئەنجومەنی ناوەندی یەكێتی : كۆمەڵێكی كەم ئیدارەو دارایی یەكێتی بۆ بەرژەوەندی خۆیان بەكاردەهێنن

06/01/2017 - 22:24 بڵاوکراوەتەوە لە هەواڵ/كوردستانی

سكرتێری ئەنجومەنی ناوەندی یەكێتی راگەیاند كۆمەڵێكی كەم ئیدارەو دارایی یەكێتی بۆ بەرژەوەندی خۆیان و سەیارەو خانو و سەفەرو كۆنفرانس لەسەر حیسابی یەكێتیی بەكاردەهێنن پشتیوانی لە بەیاننامەی راگەیاندنکارانی یەکێتیش دەکات.


عادل موراد سكرتێری ئەنجومەنی ناوەندی یەكێتی لە راگەیەنراوێكدا لە سایتی ئەنجومەنی ناوەندی یەکێتی راگەیاندوە" نیگەرانی خۆم دەردەبڕم بەرامبەر بەو سیاسەتانەی كەخەڵكی كوردستانی گەیاند بەم بارودۆخە ناهەموارە، كەحزب و كادرەكانیشی بێبەش نەبون لەخراپیی بارو گوزەرانی دارایی و ئابوری وەبەتایبەتی كادرانی مەكتەبی راگەیاندن كەرۆژانێكی زۆر وەك سەربازی ون لە رۆژگارە سەخت و دژوارەكاندا بێوچان كاریان دەكرد لەپێناو گەیاندنی پەیامی و بەرنامەی حزب لەپێناو خزمەت كردنی گەل و نیشتمان".

دەشڵێت:" ئەمڕۆ كە یەكێتییەكەیان لە دوای نەخۆش كەوتنی مام جەلال بەدەست چەندین كێشە و گرفت جۆراو جۆر دەناڵینێت‌و زۆربەیان زادەی دەست سەركردەكانێتی كەبێ گوێدانە مێژوو و جەماوەر و رای كادیر و ئەندامانی یەكێتیی، یاری بەموقدەرات و پارە و پوولی ئەم حزبەوە دەكەن كادرە دڵسۆزەكانیشی بەسكی برسی و گیرفانی خاڵی هەوڵ و كۆشش دەدەن لە پێناو پاراستنی یەكێتیی و دەسكەوتەكانی".


هەروەها سكرتێری ئەنجومەنی ناوەندی یەكێتی باس لەوەش دەكات كە سەرەڕای زیادبوونی داهاتی نەوت و غاز هەرێم كەبەشێكی زۆر كەمی دەگاتە دەستی هاوڵاتیانی و ماف خوراوانی هەرێم‌و كەمن چەندین جار داوای كشانەوەی وەزیرەكانی كرد لەم حكومەتە شكست خواردوە، بەڵام بێ هودە بوو، هەروەها ئەوەش دەڵێت كە كۆمەڵێكی كەم ئیدارەو دارایی یەكێتی بۆ بەرژەوەندی خۆیان و سەیارەو خانو و سەفەرو كۆنفرانس لەسەر حیسابی یەكێتیی بەكاردەهێنن.


عادل موراد پشتیوانی لە پاڵ كادیرانی حزبەكەی كە داوایان كردوە مافە خوراوەكانیان پێ بدرێت و تەخشان پەخشان بەپارەی حزبەوە لەپێناو كڕینی وەلائی ئەم و ئەو راگێرێت، جەختیش دەكاتەوە كە بێ گومان ئەو پارەیەی كەبۆ كڕینی وەلائی یەك كەس تەرخان دەكرێت دەتوانرێت موچەی نەدراوەكانی سەدان كادری دڵسۆز و بەئەزمونی پێ بدرێت.


عادل موراد دەڵێت"پێم وایە كشانەوەی وەزیرەكانمان كە بەركەنارخراون لەم حكومەتە ئێستا پێویستە، و دەبێت پێداگری بكەین لەدابینكردنی موچەی فەرمانبەران و هێزی پێشمەرگەی كوردستان، لەرێگەی جێبەجێكردنی یاسای بودجەی عێراق بۆ ساڵی 2017 كەمافەكانی خەڵكی كوردستانی تێدا جێگیر كراوە".


سكرتێری ئەنجومەنی ناوەندی یەكێتی داوادەكات كە بەزوترین كات مەكتەبی ئیدارەو داریی گشتی یەكێتی بخرێتە ژیر چاودێری لیژنەیەك لە ئەنجومەنی سەركردایەتی و ئەنجومەنی ناوەندی بۆ وردبینیكردن و دارشتنەوەی خەرجی و داهاتەكانی، بەشێوەیەك كە مووچەی كادیر و كارمەندەكان لەكاتی خۆیدا و بێ داوكەتن دابەش بكرێت.