حوکمەتێ ل بەرە کەرتێ پەروەردێ بەر ب کەرتێ تایبەت ببەت

05/02/2017 - 20:58 بڵاوکراوەتەوە لە هەواڵ/كوردستانی

ئەندامەکێ لیژنا پەروەردێ ل پەرلەمانێ کوردستانێ ئاشکرا کر کو چەندین بزاڤ بۆ ڤەگەڕاندنا مینحا ھەیڤانە یا قوتابیێن زانکۆ پەیمانگەھان ھاتینەکرن، بەلێ بزاڤێن لیژنێ سەرنەگرتیە، چونکی حوکمەتێ ل بەرە کەرتێ پەروەردێ بەر ب کەرتێ تایبەت ببەت.

شوان قەلادزەیی، ئەندامێ لیژنا پەروەردێ ل پەرلەمانێ کوردستانێ بۆ رۆژناما ئەڤرۆ دیار کر کو وان وەکو لیژنا پەروەردێ ل پەرمانێ کوردستانێ داخواز ژ وەزارەتێن خواندنا بلند و پەروەردێ یێن حوکمەتا ھەرێما کوردستانێ کربوو کو ئەو مینحا ھەیڤانە یا بۆ قوتابیێن زانکۆ پەیمانگەھان دھاتە مەزاختن و بەری دو سالان ھاتیە بڕین دوبارە بھێتە بەلاڤکرن، بەلێ ھەتا نوکە حوکمەتێ بەرسڤا وان نەدایە و گۆت: “دەمێ ئەڤ مینحە دھاتە بەلاڤکرن 60 ھزار دینار بۆ قوتابیێن د ناڤ باژێری دا و 100 ھزار دینار بۆ قوتابیێن ژ دەرڤەی باژێری بوون، بەلێ مخابن نوکە سەرەرایی بڕینا مینحێ ژ قوتابیان حوکمەتێ باج و رسۆمات ژی یێن ل سەر قوتابیان زێدەکرین و ھەر قوتابیەکێ نوکە ل پشکێن ناڤخۆیی بمینیت دڤێت 100 ھزار دیناران بدەتە حوکمەتێ”.

ناڤھاتی ئاماژە دا وێ چەندێ کو ھەر قوتابیەکێ ل زانکۆ پەیمانگەھان بھێتە وەرگرتن 50 ھزار دینار ژێ دھێنە وەرگرتن و پشتی ئەو قوتابی خواندنێ ب دووماھی دئینیت ب پارە باوەرناما وی د دەنەڤێ و ئەڤە د دەمەکی دایە کو ئەڤ سالە خواندنا خواندنا ماستەر و دکتۆرایێ ژی ھەموو بوویە سیستەمێ پارالێل و گۆت: “ئەڤ چەندە بوویە جھێ دلگرانیا قوتابیان و خەلک ب ڤێ چەندێ یێ رەشبینە کو حوکمەت کەرتێ پەروەردێ یا بەر ب کەرتێ تایبەت دبەت، چونکی ئەڤ چەندە د بەرژەوەندیا قوتابیان دانینە”.

ا.د