كوردیو دەقەكەی بڵاو دەكاتەوە، ئازاد جوندیانی : یەكێتی تەنها كاری بازرگانی دەكات ئازاد

11/02/2017 - 11:20 بڵاوکراوەتەوە لە هەواڵ/كوردستانی


ئازاد جوندیانی ئەندامی مەكتەبی سیاسی یەكێتی نیشتیمانی دوای 40 ساڵ لە ئەندامێتی ، بە فەرمی وازهێنانی لە یەكێتی نیشتیانی ڕاگەیاند و بە وردی تیشكی خستوەتە سەر پاڵنەرەكانی پشت وازهێنانەكەی.


لە نامەی دەست لەكاركێشانەوەی ئازاد جوندیانی ئاڕاستەی جێگرانی سكرتێری گشتی یەكێتی كردووە نوسیویەتی" ، ئەوەی من و سەدان و هەزارانی وەك منی لە یەكێتی دڵكرمێ و دڕدۆنگ و نامۆ كرد، ئەو هەڵوێستە تەماوی و ناڕۆشن و گوماناوییەیە، كە لانی كەم لە دوو سێ ساڵی ڕابردوودا بەرامبەر بە كڕۆكی ئامانجە ڕزگاریخوازیەكەی یەكێتی و مافی چارەنووس (چارەی خۆنووسین) هەیەتی، كە ئەویش سەربەخۆییە. ئەو ناڕۆشنی و گوماناوی بوون و هەڵگەڕانەوەیە لەو ئامانجە لەمێژینەی كوردایەتی، بە هەموو ئەو بڕو بیانووانەش كە بۆ خۆدزینەوە لەو ئامانجە "

 

هەروەك دەڵێت:" یەكێتی كە لە مێژووی دێرینی خۆیدا هێزێكی دەستپێشخەرو كاریگەربوو، خۆی وەك هێزێكی جەماوەری پێناسە كردبوو، بەداخەوە چەندین ساڵە ئاراستەی بەرژەوەند خوازو بازرگانكار تیایدا نەش ونمای كردووەو فراوان بووە، بە ئەندازەیەك كە ئێستا لەبری ئەوەی ئاراستە فیكری و سیاسیەكانی لەیەكتر جیا بكەیتەوەو بیانناسێنی، هەر كەسێك ئەتوانێ زۆر بە ئاسانی ئاراستە بەرژەوەند خوازەكان و تەحالفاتی بەرژەوەندی و بازرگانی تیایدا بدۆزیتەوە، لەوەش مەترسیدارتر ئەوەیە ئێستا هاوپەیمانی ئەو دەستەو تاقم و گروهانە كەخەریكی كۆنتڕۆڵكردنی دەسەڵاتی یەكێتین تا سامان و سەرمایە كەڵەكە بكەن و دووانەی دەسەڵات و سامان، كە هەر یەكەیان ( واتا دەسەڵات و سامان ) ئەویتر بەهێز ئەكاو ئەویتر ئەپارێزێ تا لەناو یەكێتیدا لەنێوان چەند گروپێك دابەشی بكەن".


دەقی نامەی دەست لەكاركێشانەوەكە:

برایانی بەڕێزم كاك كۆسرەت و كاك دكتۆر بەرهەم جێگرانی سكرتێری گشتی یەكیێتی نیشتمانی كوردستان

خوشك و برایانی بەڕێزی مەكتەبی سیاسی و ئەنجومەنی سەركردایەتی

خوشك و برایانی بەڕێزی ئەنجومەنی ناوەند

بە سڵاوی گەرم و برایانەوە .

بەرلەهەر شتێك ئەبێ ئەوە بەڕوونی بڵێم و بەئێوەو بە ئۆرگان و هەڤاڵانی ناوخۆی یەكێتی و هێزی پێشمەرگەو كەس وكاری شەهیدانی سەربەرز ڕابگەیەنم ، كە ئەگەر جەنابی مام جەلال لەگەڵماندا لە كایەكەدا بووایە ، سەرەڕای هەبوونی هەر سەرنج و ڕەخنەیەك، ئەم نامەیە هەرگیز نەئەنووسرا .

بەڕێزان ... ئەمساڵ چل ساڵی ڕەبەق بەسەر پەیوەندی كردنم بە ڕیزەكانی یەكێتی نیشتمانی كوردستان (كۆمەڵە)دا تێ ئەپەڕێ . لەماوەی ئەو چل ساڵەداو لە هەموو قۆناخەكانی خەباتی نهێنی شارو شاخ و قۆناخی دوای ڕاپەڕین و دوای ڕوخانی ڕژێمی بەعس، بەقەد تواناكانی خۆم و بگرە پتریش لە تواناكانم، لە پێناوی ستراتیژی كوردایەتیدا، كە ڕزگاری و سەربەخۆیی كوردستان بووە وەك پێشمەرگەو كادر و نووسەر و بوارەكانی تر لە ڕیزەكانی یەكێتیدا تێكۆشاوم. جگە لەمەترسیەكانی خەباتی نهێنی و ژیانی سەختی پێشمەرگایەتی بە غیابیش لەلایەن دادگا فاشیستیەكانی ڕژێم زیندانی هەتا هەتاییم بۆ بڕاوەتەوە. هاوكات لەو چل ساڵەی خەباتمدا شەرەفمەندبووم كە لەگەڵ دەیان و سەدان و بگرە هەزاران هەڤاڵی ڕێكخستنی نهێنی و پێشمەرگە و هاووڵاتیانی خەباتگێڕو دلسۆزی شۆڕش و كوردایەتیدا ئاشنابووم، كە ژمارەیەكی زۆر لەو هەڤاڵ و هاوڕێیانەم شەهید یان كەمئەندام بوون . ئێستاو دواتریش هاوخەباتی و هاوسەنگەریم لەگەڵ هەموویان بۆ من ئەمڕۆو بەیانیش جێی شانازییە، هەربۆیە بە ئەركی ئەخلاقی خۆمی ئەزانم كە لەم نامەیەشمدا درود بنێرم بۆ گیانی شەهیدانی سەربەرزی كوردستان و بۆ هەموو ئەو هەڤاڵانەش، كە خۆشبەختانە هێشتا لە ژیاندا ماون .

بەڕێزان .. بەدرێژایی تەمەنی تێكۆشانم لە ڕیزەكانی یەكێتیدا، دڵسۆزانەو سەر ڕاستانە كارم كردووە، لەوەش دیارتر هەر لە كۆنگرەی یەكەمینی یەكێتیەوە، كە هەڤاڵ مام جەلال كەوتە بەر هێڕشی ناڕەواو تا هەموو ئەو قۆناخ و ساتە وەختانەی كە لەناوخۆی یەكیێتیدا پیلان لە دژی یەكێتی و هەڤاڵ مام جەلال گێردراوە ، من لەو سەنگەرەدا وەستاوم كە سەنگەری بەرگریكردن بووە لە شكۆی یەكێتی و هەڤاڵ مام جەلال، كە لە هێندێ قۆناخدا ئەو لایەنگرییە بێ پەروایەی وەك من و كەسانی تریش باجی زۆری هەبووە، بەڵام من سڵم نەكردۆتەوە .

بەڕێزان . لەدوای دواهەمین نەخۆشكەوتنی هەڤاڵ مام جەلالەوە، كە بووە هۆی ئەوەی ئەو سەركردە جێ متمانەیەی زۆرانمان بەهۆی بارە تەندروستییەكەیەوە لێمان داببڕێ و لەكایەكەدا نەمێنێ، لەگەڵ ژمارەیەكی زۆر لە هەڤاڵانی ئاستی باڵاو مام ناوەنج و قاعیدەی یەكێتیدا، كەوتینە خۆمان تا شان بدەینە بەر ئەو ئیستحقاقانەی، كە قۆناخی غیابی كردەكی مام جەلال ڕوبەڕووی یەكێتیەكانی ئەكردەوە. ئامانجمان ئەوەبوو، كە یەكێتی بە شكۆی جارانیەوە بهێڵینەوە و هاوكات كۆك و ئاوێتە بێ بە ماناو دەلالەت و زەروریەتەكانی تێكۆشانی سەردەم و ئایندەخوازی. بەداخەوە، ئەو هەڤاڵانەی كە بڕوامان بەوە هەبوو، یەكێتی سەر لەنوێ لەسەر بناغەی ڕەسەنایەتی مێژوویی خۆیی و مۆدێرنەتركردنی پێناسە بكەینەوەو بەرخورداری بكەینەوە بە شوناس و پەیكەرەو گوتاری نوێ و وەك سەرەتاكانی دامەزراندنی بیكەینەوە بە نەك تەنیا دامەزراوەیەكی حزبی، بەڵكو بیكەینەوە بە دیاردەیەكی كۆمەڵایەتی ئەوتۆش، كە بە چەمكی نوێ و ڕوخساری نوێوە ببێتە مەكۆی كەمەندكێشكردنی نەوەكانی نوێی كوردستان و كوردایەتی. گەرەكم نیە لەم نامەیەمدا مێژووی قۆناخێك بگێڕمەوە، كە هێشتا تیایدا ئەژین و لێكەوتەو جێكەوتەكانی لە نەش ونماو هەڵبەزو دابەزدان. بەڵكو تەنیا مەبەستمە بڵێم : بە داخەوە هەوڵی ئەو بەر ەناوخۆییە فرە ڕەنگ و فرە دەنگەی یەكێتی، كە ئامانجی بوو ڕێ لەوە بگرێ غیابی كردەكی مام جەلال ببێتە ئەو چاڵە مەترسیدارەی كە ئێستاكێ هەیە، دواجار ئەو ڕەوتە بەهۆی هەڵەكانی خۆیی و هەبوونی نەزعەیەكی بەهێزی تەصفەوییانە، بەو ئامانجانە نەگەیشت، كە بۆی تێ ئەكۆشا. دیاریش نیە ئەو زیانانە چەندو چۆن ئەبن كە گومانم نیە لەوەی بەر یەكێتی ئەكەون، لەو سۆنگەیەدا ئەوەی كە جێی ئاماژەی خێرایە ئەوەیە كە ئێستا یەكێتی بۆتە هێزێكی سیاسی پەرت پەرتی بێشوناسێكی دیارو بەرجەستەبوو، لەمەش مەترسیدارتر ئەوەیە كە ئَێستا یەكێتی لەدەستێكی ئەمین دانیە و هەموو خوێندنەوەو ئاماژەكانیش ئەوەنیشان ئەدەن، كە لە داهاتووشدا ناكەوێتە دەستێكی ئەمینی ئەوتۆ كە كۆكەرەوەی هەموو دەنگ و ڕەنگەكانی بێت .

بەڕێزان، گەرەكمە بە ڕوونی ئەوەش بڵێم، ئەوەی من و سەدان و هەزارانی وەك منی لە یەكێتی دڵكرمێ و دڕدۆنگ و نامۆ كرد، ئەو هەڵوێستە تەماوی و ناڕۆشن و گوماناوییەیە، كە لانی كەم لە دوو سێ ساڵی ڕابردوودا بەرامبەر بە كڕۆكی ئامانجە ڕزگاریخوازیەكەی یەكێتی و مافی چارەنووس (چارەی خۆنووسین) هەیەتی، كە ئەویش سەربەخۆییە. ئەو ناڕۆشنی و گوماناوی بوون و هەڵگەڕانەوەیە لەو ئامانجە لەمێژینەی كوردایەتی، بە هەموو ئەو بڕو بیانووانەش كە بۆ خۆدزینەوە لەو ئامانجە پڕوپاگەندەی پێوە ئەكرێ جێی پەسندی هەزاران تێكۆشەر نەبووەو نیە، كە بەشانازییەوە منیش لەو بەرەیەدام كە دژی سیاسەتی بەتاڵكردنەوەی كوردایەتیە لە ناوەرۆكی سەربەخۆیی .

بەڕێزان .. لەلاێكی دیكەوە، یەكێتی كە لە مێژووی دێرینی خۆیدا هێزێكی دەستپێشخەرو كاریگەربوو، خۆی وەك هێزێكی جەماوەری پێناسە كردبوو، بەداخەوە چەندین ساڵە ئاراستەی بەرژەوەند خوازو بازرگانكار تیایدا نەش ونمای كردووەو فراوان بووە، بە ئەندازەیەك كە ئێستا لەبری ئەوەی ئاراستە فیكری و سیاسیەكانی لەیەكتر جیا بكەیتەوەو بیانناسێنی، هەر كەسێك ئەتوانێ زۆر بە ئاسانی ئاراستە بەرژەوەند خوازەكان و تەحالفاتی بەرژەوەندی و بازرگانی تیایدا بدۆزیتەوە، لەوەش مەترسیدارتر ئەوەیە ئێستا هاوپەیمانی ئەو دەستەو تاقم و گروهانە كەخەریكی كۆنتڕۆڵكردنی دەسەڵاتی یەكێتین تا سامان و سەرمایە كەڵەكە بكەن و دووانەی دەسەڵات و سامان، كە هەر یەكەیان ( واتا دەسەڵات و سامان ) ئەویتر بەهێز ئەكاو ئەویتر ئەپارێزێ تا لەناو یەكێتیدا لەنێوان چەند گروپێك دابەشی بكەن. كادرو ئەندام و دەنگدەرو لایەنگرانی یەكێتی بە ڕوونی هەبوونی ئەو ئاراستەیە ئەبینن و ئەزانن و ڕۆژانە لەناو كۆڕو مەجلیسە كۆمەڵایەتییەكانی خۆیان و لە میانی دەردە دڵەكانیاندا بەبەردەوامی باسی ئەكەن .

كۆنتڕۆڵ و قۆرخكردنی یەكێتی، بەمەرامی گرتنە دەستی هەژموونی دووانەی دەسەڵات و سامان، بە تایبەت دوای نەخۆشكەوتنی مام جەلال، هەموو شێواز و وەسیلەیەكی بۆ گیرایە بەر، بە نەخۆشی مام جەلال و بگرە بە جەستە ماندوو شەكەتەكەیەوە . هەموومان بیرمانە لە ساتە وەختی نەخۆشكەوتنیەوە، دەیان جار نەك تەنیا جەماوەری كوردستان و یەكێتی بگرە جەماوەری كوردستان و عیراقیش راستیان لەگەڵ نەئەوتراو بێ بڕیارو ئاگاداری حزب یان بێ بڕیار و ئاگاداری دەوڵەتی عیراق، كە مام جەلال سەرۆك كۆماری بوو, كەیسی نەخۆشیەكەی بە شێوەیەكی ناڕەوا بەكار ئەهێنرا و لە هەردوو جێگری سكرتێرو زۆرینەی مەكتەبی سیاسی و سەركردایەتی ئەشاردرایەوەو دنیاشیان پڕ كردبوو لە دەستەواژەو سیناریۆی عاتفیانە، تا جەماوەری یەكێتی دەستەمۆو ناچار بە بێ دەنگی بكەن. ئایا ئەوانەی وایان ئەكرد ئامانجیان ڕێزگرتن بوو لە مام جەلال، یان بەكارهێنانی نەخۆشیەكەی بوو بۆ خۆدزینەوە لەو ئیستحقاقانەی كە لە لاێكەوە دەستووری بوون لە ئاستی دەوڵەتداو لە لایەنی حزبیشدا پەیڕەو ئەی سەپاندن ؟ باڵێكی حزب گەمەی سیاسی بەو كەیسەوە ئەكرد و لایەكیش، گەرچی ناڕازی بوو، بەڵام بێدەنگەی لێ ئەكرد. من ئەمەوێ لەم بارەوە سەرنجتان بخەمە سەر یەك بابەت، بەدرێژایی نەخۆشكەوتنی مام جەلال هیچ ڕاپۆرتێكی ڕەسمی تیمەكانی چارەسەری ئەمێرجنسی بەغدا ، كە تیمی عیراق و دواتر ئێرانیش بوون، هەروا ڕاپۆرتی تیمی نەخۆشخانە ئەڵمانیەكەش كە ماوەیەكی زۆر دوورودرێژ چارەسەریان ئەكرد نەخراوەتە بەردەم ڕای گشتی یەكێتی یان بەردەم ئۆرگانە باڵاكانی یەكێتیش. هەموومان ئەو سەردەمە تەنیا گوێ بیسی لێدوانی ئەم یان ئەو ئەبووین لەبارەی تەندروستی مام جەلال، بێ ئەوەی هیچ شتێك ڕوون ببێتەوە كە ئایا سەركردەكەمان توانای نزمترین ئاستی بەڕێوەبردنی حزبەكەی ماوە؟ ئەوەی سەیرە دامەزراوە دەستوورییەكانی عیراق و حزبە سیاسییەكان و فراكسیۆنەكانی پەرلەمانی بەغداو عیراقیش لەبەرامبەر ئەو گەمە سیاسیەی لەسەر حسابی تەندروستی مام جەلال بەڕێوە ئەچوو، خۆیان بێدەنگ كردبوو. من ئەوساو ئێستاش گومانم هەیە كە ئەو خۆبێ دەنگ كردنە تەنیا تەعبیرێك نەبوو لە ڕێز و خۆشەویستی و وەفا بۆ مام جەلال، ئەگەری ئەوە زۆرە كە لە پشت پەردەوە زۆر ڕێك كەوتنی سیاسی گوماناوی، بە تایبەت لە بەغدا لە ئارادابووبێ، كە ڕەنگە داهاتوو ئەوەمان بۆ ساغ بكاتەوە. واز لەوەی بەغدا دێنم و دێمەوە سەر دەرهاوێشتەكانی ئەو جۆرە ڕەفتارو سیاسەتە لەگەڵ كەیسی نەخۆشی مام جەلال. جارێ بەر لەهەموو شتێك ئەو دەسەڵاتانەی كە بە پێی پەیڕەو لای سكرتێری گشتین, ئەبووایە هەر بە پێی پەیڕەو بدرێنە دەست جێگری یەكەم و دووەمی سكرتێری گشتی, بەڵام وا نەكراو بەشێوەیەكی پێچەوانەی پەیڕەو ئەو دەسەڵاتانە بە كردەوە كەوتنە دەست ئەندامێكی مەكتەبی سیاسی، ئەمیش ژمارەیەكی جێ بڕوای خۆی لە بازنەی خێزانی و كەسانی تر, كردە هاوكار یان هاوبەشی پراكتیزەكردنی ئەو دەسەڵاتانە، كە هەم لای ئەوبوونی دەسەڵاتەكان و شەریكە بەشە دەستنیشانكراوەكانیشی، پێچەوانەی پەیڕەو بوو بە تەواوەتی هیچ جۆرە شەرعیەتێكی نەبووەو نیە. زۆر ڕێگە هەبوون بۆ ئەوەی یەكێتی لەم بەڕێوەبردنە ناشەرعیە بپارێزرێ، لەوانە كۆنگرە، كە پلینۆم دوا ماوەو مۆڵەتی شەرعیەتی بۆ ئەنجامدانی كۆنگرە دیاركردو لیژنەی باڵاش بۆ ئامادەكاری پێك هێنراو كارەكانی خۆشی تەواوكرد, بەڵام بە سیناریۆیەكی سەراپا گوماناوی و ناشەرعی ڕێگە لە بەستنی كۆنگرە گیراو بەمەش تەواوی كۆمیتەی سەركردایەتی، بێ هیچ هەڵاوێردێك كەوتە قۆناخی لەدەستدانی شەرعیەتەوە . كاتێك جێگری دووەمی سكرتێری گشتی لە لێدوانێكدا دانی بە ناشەڕعی بوونی سەركردایەتی نا بەهۆی دواخستنی كۆنگرەو كۆتایی هاتنی ئەو مۆڵەتەی كە پلینۆم دابووی بۆ بەستنی، لایەنگرانی ناشەرعی بوونی كەڵك وەرگرتن لە هەموو ئیمكانیەتەكانی دەزگای زانیاری و دژەتیرۆر و دەزگا میدییایەكانی یەكێتی بە توندترین شێوە كەوتنە تۆمەت بەخشینەوە بە جێگری دووەمی سكرتێری گشتی, كە ئامانجیان لەو شاڵاوەی پڕوپاگندەیە تەنیا جێگری دووەم نەبوو، بەڵكو ئەمەشیان وەك وەسیلەیەك بەكارهێنا تا هیچ كەسێكی تر لەناو ڕیزەكانی ڕێكخستندا جورئەت نەكا، باسی كۆنگرە و دواجار ئیستحقاقەكانی كەیسی نەخۆشكەوتنی مام جەلال بكا. ئەو سەردەمە زۆر نموونەیی بوو تا یەكێتیەكان لەبەرامبەر سیناریۆكانی ناشەرعی كردنی یەكێتی بووەستنەوە، بەداخەوە ئێمەمانانی ناو مەكتەبی سیاسیش، كە لایەنگری بەستنی كۆنگرەو یەكلاكردنەوەی كێشەكانی ناوخۆی یەكێتی بووین لەڕێی كۆنگرەوە، جگە لە ناڕازیبوونێكی بێ كردار هیچی ترمان نەكرد .

لە لایێكی دیكەوە، یەكیێتی بەهۆی هەوڵ و سیاسەتی قۆرخكردن و گۆڕینی ئاراستەی ئیدارەدانی یەكێتی بەرەو سەپاندنی پەیكەرەیەكی بنەماڵەیی بۆ ڕێبەرایەتی و بڕیاروەرگرتن، بنەمافەلسەفییەكانی خۆی پایماڵ كرد و یەكیێتیان لەو پرەنسیپ و بنەماو بەهایانە هەڵگێڕایەوە ، كە لەسەری دامەزرابوو .

خاڵێكی تر ، كە جێی لەسەروەستانە ئەوەیە ئێستا لەناوریزەكانی یەكێتی و جەماوەریشدا قسەو باس لەسەر ئەوەیە كە هێندەی یەكێتی وەك حزب و پرۆسە سیاسیەكەی خراوەتە خزمەتی بەرژەوەندی بازرگانی و صفقاتەكانی نەخراوەتە خزمەتی بەرژەوەندییە سیاسیە حزبی و نەتەوەیی و نیشتمانیەكان ، ئەو بەرژەوەندییە بازرگانیە بواری جیاجیای گرتۆتەوە لە نەوتەوە بگرە بازرگانی قۆرخكراوی جگەرەو دەرمان و سۆنەری سنوورەكان و بازرگانی ناشەرعی هێنان و بردنی دەستی كاری بیانی . بێ ئەوەی زۆربەی ئەو داهاتانەی لەو بازرگانیە دەست ئەكەوێ بخرێنە خزمەتی هاووڵاتیان یاخۆ بخرێنە خزمەتی كادر و ئۆرگانەكانی یەكێتی . بەواتایەكی تر و ڕوونتر ئێستا لەناو یەكێتیدا تۆڕێك لە كۆمپانیا و گروپی بازرگانی ئەم و ئەو بڵاوبۆتەوەو سیمای كارتلێكی لە نێوان كۆمپانیاو بەرژەوەندییە بازرگانییەكان بە حزبەكە بەخشیوە و ڕۆژدوای ڕۆژ سیماو مۆركی حزبایەتی ( مۆدێرن و نامۆدێرن ) یەكیێتی كاڵ و كاڵتر ئەبێتەوەو زۆربەی زۆری جەماوەری یەكێتی و كادرەكانیشی ئەو ڕاستیە باش ئەزانن ، كە یەكێتی لەبری ئەوەی حصرا وەسیلەی تێكۆشان و كوردایەتی بێت ، ئێستا زۆرتر بۆتە وەسیلەی زامن كردنی بەرژەوەندییە بازرگانی و مالیەكانی دوسێ گروپی دەستڕۆیشتوو. ئەمە ئەو ڕاستیەیە كە هەموو یەكێتیەكان ئەیزانن و بە ئاشكراش باسی ئەكەن ، ڕەنگە گەڕانێكی خێرا بەناو تۆڕەكۆمەڵایەتیەكان و هەروا سایتەكان بەس بێت بۆ ئەوەی لەوە بگەین ، كە قاعدەی یەكێتی ئەم دۆخەی بەكاڵاكردنی یەكێتی ئەزانێ و ئەبینێ .

دڵنیام كە باسكردنی هەموو ئەو لادانانەی لە یەكێتیدا ، بەتایبەت دوای نەخۆشكەوتی بەڕێز مام جەلال بەدەستی ئەنقەست و بەمەبەستی قۆرخكردن و ڕكێفكردنی یەكێتی ڕوویانداوەو بەشێوەیەكی خێرا لەپەرەسندندان ، سەدان لاپەڕەی پێویستە . كە من دڵنیام زۆری پێ ناچێ كاتێك بەرژەوەندی قۆرخكارانی ناو یەكێتی بە توندی لەسەر دەسەڵات یان صفقات بەریەك ئەكەون ، هەموو ئەو زانیارییانەی ئێستا نهێنین و دەستاودەست ئەكەن ، ئاشكرا ئەبن و هەمووان تێ ئەگەن كە چ وێرانیێك لەناو یەكێتیدا ڕوویداوە . كە بەداخەوە منیش و زۆر لە هەڤاڵانیش ویستمان پێش بەو ڕووداو و لادانانە بگرین بەڵام لەبەرامبەرماندا ، بە تایبەت بەرامبەر بە من ڤیتۆو دژایەتیكردن پەیڕەو ئەكرا .

ئێستا دێمە سەر جەوهەری نامەكەم و ئەمەوێ بە هەموو لایەكتان ڕابگەیەنم ، كە ئەمڕۆ ، دوای چل ساڵ لە هاوڕێگە بوون لە گەڵتاندا ، بڕیارم داوە ژیانی (حزبایەتی) جێبهێڵم و شێوازی تر بۆ سیاسەتكردن و كوردایەتی بگرمە بەر ، بێ ئەوەی بۆ یەك تاكە ڕۆژیش لە ئەركی كوردایەتی داببڕێم یان سارد ببمەوە، لای من چەمكی كوردایەتی یەكسانە بە چەمكی سەربەخۆیی كوردستان كە زۆر پێشووتریش وتوومە و لێشی دانابڕێم . بۆیە ڕایئەگەیەنم ، كە لەنووسینی ئەم نامەیەوە، هەر جۆرە پەیوەندیێكی حزبی و سیاسیم لەگەڵ یەكێتی نیشتمانی كوردستان كۆتایی پێ دێ، هیواخوازم دوای ئەوەش شەرەفمەند بم بە پاراستن و بەردەوام بوونی پەیوەندییە كۆمەڵایەتییەكانم لەگەڵ یەكەیەكەتان و هەموو هەڤاڵان و پێشمەرگەو كەس وكاری سەربەرزی شەهیدان . هاوكات هیوادارم هەمووتان تەندروست بن و لە ژیانی شەخسیتاندا سەركەوتوو بن .

ڕێزی زۆرم بۆ هەموو لایەكتان و هەمیشە لەشساغ وشادمان بن .

ئازاد جندیانی

( ئازاد عبدالوهاب محمدعلی )

ئەندامی یەدەگی مەكتەبی سیاسی

یەكیێتی نیشتمانی كوردستان

9 / 2/ 2017

تێبینی : بۆ یەكلاكردنەوەو پاكتاوكردنی هێندێ كاروباری ئیداری ، كە بەهۆی دەست لەكاركێشانەوەم دێنە پێشەوە ، دواتر نوێنەرێكی خۆم دیار ئەكەم تا لەگەڵ لایەن و ئۆرگانە پەیوەندیدارەكانی یەكێتیدا هاوئاهەنگی بكا .