وەزارەتی خوێندنی باڵا داواكارییەك رەتدەكاتەوە

01/03/2017 - 10:56 بڵاوکراوەتەوە لە هەواڵ/كوردستانی
لە كۆبونەوەی ئەنجومەنی وەزارەتی خوێندنی باڵا و توێژینەوەی زانستی چەند بڕیارێك دەركرا و داواكارییەكی كاندیدانی ماستەر و دكتۆراش رەتكرایەوە.

ماڵپه‌ری وەزارەتی خوێندنی باڵا بڵاویكردەوە: لەو كۆبوونەوەیەدا چۆنیەتی بەڕێوەبردنی لایەنی دارایی زانكۆكان و سیستمی وەرگرتنی ڕاستەوخۆی زانكۆیی و سیستمی بەئەلیكترۆنیكردنی دامەزراوەكانی خوێندنی باڵا و گرنگیدان بە تەندروستی و چەند تەوەرێكی تر گفتوگۆیان لەبارەوە كراوە.

ئاماژه‌ی به‌وه‌شكردووه‌ : لە كۆبونەوەكەدا تاوتوێی چۆنیەتی بەرەوپێشبردنی وەرگرتنی شێوازی ڕاستەوخۆی زانكۆیی بۆ ساڵی خوێندنی 2017-2018) لە زانكۆكان كرا، بە جۆرێك هەموو بەشەكان بگرێتەوە، جگە لە بەشەكانی (پزیشكی، ئەندازیاری، یاسا) كە هەر بە شێوەی وەرگرتنی ناوەندی (قبول مركزی) دەمێنێتـەوە.
لە كۆبوونەوەكەدا د.یوسف گۆران وەزیری خوێندنی باڵا و توێژینەوەی زانستی رایگەیاند: سیستمی ناوەندیی وەرگرتن جگە لەوەی رەچاوی ئارەزووی خوێندكاری تێدا نەدەكرا، لەهەمانكاتدا زانكۆش نەیدەتوانی ستراتیژی كاری خۆیی لەسەر دابنێ.

ناوبراو وتیشی: هەر زانكۆیەك ئارەزوو دەكات ئەو شێوازە فراوان بكات دەتوانێت داواكەی بەرز بكاتەوە.

بڕیاریشدرا"بە دوو قۆناغ دەرچوانی دوانزەی ئامادەیی لە زانكۆكان بۆ ساڵی خوێندنی (2017-2018) بە سیستمی وەرگرتنی راستەوخۆی زانكۆیی وەربگرێن، بە شێوەیەك بۆ هەر خولێك ڕێژەیەك دیاری دەكرێ، هەر بۆ ئەو مەبەستەش لە كۆبونەوەكە بڕیاردرا لە چەند ڕۆژی داهاتودا لیژنەی باڵای خوێندن و پلانی وەرگرتن كۆبونەوەیەك ئەنجام بدەن بۆ دیراسەكردنی پڕۆسەی وەرگرتن و دانانی میكانزمی گونجاو بۆ دیاریكردنی ڕێژەی خولەكان (خولی یەكەم ، خولی دوەم) لەگەڵ وردەكارییەكانی پڕۆسەكە".

هاوكات داواكاری كاندیدەكانی خوێندنی باڵا/ ماستەر و دكتۆرا بۆ پێداچونەوە بە مەرجی زمانی ئینگلیزی رەتكرایەوە و بڕیاردرا مەرجی زمان هەر وەك خۆی بمێنێتەوە.
 
 
 
 
هونه‌ر بانه‌گوڵانی