سیستمی فرۆشتنی دەرمان لە دەرمانخانەكاندا دەكرێتە كۆمپیوتەری

11/07/2019 - 17:28 بڵاوکراوەتەوە لە هەواڵ/كوردستانی

 

ئەندامێكی ئەنجومەنی سەندیكای پزیشكان ڕایدەگەیەنێت: سەرۆكایەتی ئەنجومەنی وەزیران لە كابینەی هەشت بڕیاری دەركرد كە پێویستە هەموو دەرمانخانەكانی هەرێمی كوردستان سیستمی فرۆشتن بكەنە كۆمپیوتەری.

د. چالاك كەریم، ئەندامێكی ئەنجومەنی سەندیكای پزیشكان بە ڕۆژنامەنوسان ڕایگەیاند: دوای ئەوەی سەرۆكایەتی ئەنجومەنی وەزیران لە كابینەی هەشت بڕیاری دا كە پێویستە هەموو دەرمانخانەكانی هەرێمی كوردستان سیستمی فرۆشتن بكەنە كۆمپیوتەری لە ئێستادا سەندیكای دەرمانسازانی كوردستان هەستاوە بەجێبەجێكردنی ئەو بڕیارە.

 

هەروەها وتیشی: لە ئێستادا دەرمانخانەكان خۆیان سەرپشكن لەگەڵ هەر كۆمپانیایەك ڕێكەوتن دەكەن بۆ بەسیستمكردنی دەرمانخانەكانیان بەڵام پێویستە لەماوەی دوو مانگداو تا بەرواری 10-9-2019 هەموو دەرمانخانەكان سیستمی فرۆشتنیان بكەنە كۆمپیوتەری و پابەندبن بەو بڕیارەوە.

 

سەبارەت بە سودەكان سیستمی كۆمپیوتەری لە دەرمانخانەكاندا ئاماژەی بەوەدا: ئەم سیستمە چەندین سودی هەیە بۆ هاوڵاتیان و بەوەی كاتێك هاوڵاتیان سەردانی هەر دەرمانخانەیەك دەكەن تەوای زانیاریەكانی لە پسوڵەیەكی كۆمپیوتەریدا پێدەدرێت لەبارەی نەخۆشیەكەی و جۆری دەرمانەكەو نرخی دەرمانەكەو بەرواری سەردانیكردنەكەو ناوی نەخۆشەكەو ناوی پزیشكەكە، ئەم پسوڵەیەش دەبێتە بەڵگە لەكاتی بونی كێشە لە خراپی دەرمان و هەڵەی پزیشكی و لەكاتی سكاڵای هاوڵاتیان لە دكتۆرەكان.