ڤیدیۆ.. به‌ تۆمه‌تی سوتاندنی كتێبخانه‌ی ماڵی وه‌فایی "فه‌رهاد پیرباڵ" ده‌ستگیر كرا

14/07/2019 - 14:25 بڵاوکراوەتەوە لە هەواڵ/كوردستانی

دوای ئه‌وه‌ی شەوی ڕابردوو كتێبخانەی (ماڵی وەفایی) شاری هەولێر سووتا و خاوەنی كتێبخانەكەش فەرهاد پیرباڵ تۆمەتبار كرد بەڕێوەبەری پۆلیسی هەولێریش رایده‌گه‌یه‌نێت لەسەر سکاڵایەکی خاوەنی ماڵی وەفایی کە فەرهاد پیرباڵ سوتاندویەتی، ئەمڕۆ ناوبراومان دەستگیرکرد.

لیوا عەبدولخاڵق تەڵعەت، بەڕێوەبەری گشتی پۆلیسی هەولێر به‌ ده‌زگاكانی راگه‌یه‌ندنی راگه‌یاندووه‌"دوای ئەوەی سكاڵای یاسایی لە دژی د. فەرهاد پیرباڵ تۆمار كرا بەتۆمەتی سووتاندنی كتێبخانەی ماڵی وەفایی، ئەمڕۆ بە فەرمانی دادوەر دەستگیركرا"

له‌ باره‌ی هۆكاری سوتاندنی كتێبخانه‌ی ماڵی وه‌فایی فه‌رهاد پیرباڵ له‌ هه‌ژماری تایبه‌تی خۆی له‌ تۆری كۆمه‌ڵایه‌تی نوسیوه‌یتی من به‌خاوه‌نی كتێبخانه‌كه‌م وتووه‌ " ئێوە بەبێ پرسی من و بەبێ گرێبەستی قانوونی، زیاتر لە ٣ کتێبی منتان، بەم دوو کتێبە نوێیەشمەوە ٥ کتێبی منتان چاپ کردووە و دەیفرشن دانەی بە (١٥) هەزار دینار و 7000 دینار بۆ خۆتان؛ تکایە چیتر وا مەکەن.. گوتم کتێبەکانیشم هەموو لێتان دەوێتەوە و دەبێ بمدەنەوە ئەگینا کتێبەکانی خۆم لەناو مەخزەنەکەتان دەسووتێنم.. گوتی: بڕۆ مەحکەمە شکایەت بکە! گوتم ئاخر من .... ناتوانم. گوتی: ئەمە موشکیلەی من نیە ئی خۆتە!"

هه‌روه‌ها نووسیوه‌تی "موشکیلەی خۆم - ئەگەر قانوون نەبێت بۆ _مافی کۆپی ڕایت - ئاوها چارەسەری دەکەم! ئەمەی کردم پەیامێکە بۆ پەرلەمان لەپێناو ئەوەی قانوون دابنێت مافی نووسەر و ڕۆشنبیر و هونەرمەندان لەمڕۆوە پارێزراو بێت."

 

 

ڕەنگاڵە