چەند گەشتیارێكی كورد لەسەر ئاڵای كوردستان لەتوركیا دەستگیركراون

19/07/2019 - 13:53 بڵاوکراوەتەوە لە هەواڵ/كوردستانی

 

 

كۆمەڵێك گەشتیاری باشوری كوردستان كە بۆ گەشتكردن چوونەتە توركیا لە شاری ترابزۆن ویستوویانە وێنەبگرن، یەكێك لە گەشتیارەكان ویستوویەتی بەئاڵای كوردستانەوە وێنەبگرێت، بەڵام لەلایەن ڕەگەز پەرستێكی توركەوە هێرشیان كراوەتە سەر.

بەگوێرەی هەواڵێكی ماڵپەڕی (Arti Gerçek) دیمەنێكی ڤیدیۆیی بڵاوكردۆتەوە لە شاری ترابزۆنی توركیا، چەند ڕەگەز پەرستێكی تورك هێرشیان كردۆتە سەر یەكێك لەو گەشتیارانەی باشوری كوردستان لەكاتێكدا ویستوویەتی بە ئاڵای كوردستانەوە وێنە بگرێت.

لەكاتی سەردانی ئەو گەشتیارانەی باشوری كوردستان بۆ شاری ترابزۆن یەكێك لە گەشتیارەكان دەیەوێت بە ئاڵای كوردستانەوە وێنە بگرێت، لەو كاتەدا لەلایەن ژمارەیەك لە رەگەز پەرستە توركەكان هێرشی دەكرێتە سەر، لەگەڵ ئەوەی لەو ناوچەیەدا جەندرمە بوونیان هەبووە، بەڵام وەك لەدیمەنەكاندا دەردەكەوێت ئەو گەشتیارە بۆ ماوەیەكی زۆر هێرشی دەكرێتە سەرو هاوار دەكات كەس ناچێت بە دەنگییەوەو دوای ماوەیەكی درەنگ جەندرمەكان دەچن بە دەنگییەوە.

ئەو كەسەشی دیمەنی هێرشكردنەكەی تۆمار كردووە سوكایەتی بەكورد دەكات و دەڵێت ئێوە كێن ئێوە بێ‌ مێژوون.

بەپێی زانیارییەكانیش ئێستا ئەو گەشتیارانە كە ژمارەیان نۆ كەس بووە لەلایەن پۆلیسی توركیاوە دەستگیركراون.