داعش ئەم گوندە بۆردومان دەكات

22/07/2019 - 09:06 بڵاوکراوەتەوە لە هەواڵ/كوردستانی

 

 

گروپە چەكدارەكانی داعش بە هاوەن بۆردوومانی گوندی ئیسڵاحیان كرد لە سنووری شارۆچكەی گوڵاڵە جگە لە زیانی ماددی، هیچ زیانێكی گیانی لێنەكەوتەوە.

شەوی رابردوو لە سنووری شارەدێی گوڵاڵەی سەر بەشارۆچكەی خانەقین، چەكدارەكانی داعش گوندی ئیسڵاحی سەر بە ناوچەی شێخ باوەیان بۆردوومان كرد.

بەپێی ئەو زانیارییانەی ئەفسەرێكی بنكەی پۆلیسی گوڵاڵە بەڕۆژنیوزی داوە، داعش بە هاوەن، گوندی ئیسڵاحی بۆردوومان كردووە، هیچ زیانێكی گیانی نەبووە، یەكێك لە گوولە هاوەنەكان بەر خانوویەك كەوتووە، بەڵام زیانی گیانی بەدواوە نەبووە.

ئەو سەرچاوەیە ئاماژەی بەوەشكردووە، بەهۆی بۆردوومانی چەكدارەكانەوە، دانیشتوانی گوندەكە چووبوونە دەرەوەی ماڵەكانیان.

لەلایەكی دیكەوە، ڕائید (سمكۆ جەبار) بەرپرسی ئاسایشی شارەدێی كۆكسی سەر بەشارۆچكەی كفری رایگەیاندووە، هاوەنەكان لە نزیك گوندەكەوە ئاڕاستەی ناو گوندەكە كراوە، داعش بەئاشكرا بوونی هەیە لە سنووری شێخ باوەو توانیویانە چڕی دارستانەكانی ئەو ناوچانە بۆ خۆیان بەكاربێنن بۆ ئەنجامدانی كردەوە تیرۆریستیەكان.

بۆردوومانكردنی گوندی ئیسڵاح، دوای ئەوە دێت، كە دوێنێ‌ لەهەمان گوند بەهۆی تەقینەوەی بۆمبێكی چێنراوەوە هاوڵاتیەك گیانی لەدەستدا.