نووسەر و شاعیرێكی بەناوبانگی كورد كۆچی دواییكرد

22/07/2019 - 10:34 بڵاوکراوەتەوە لە هەواڵ/كوردستانی

 

 ئەم شەوی ڕابرددوو نووسەر و شاعیر فەرید زامدار  دوای ململانێیەكی سەخت لەگەڵ نەخۆشیدا، لەتەمەنی حەفتا ساڵی كۆچی دواییكرد و ئەمڕۆ  دووشەممە یەكەمین رۆژی پرسەكەیەتی.

 

هەڵگورد جوندیانی لەلاپەڕەی تایبەتی خۆی لە تۆڕی كۆمەڵایەتی فەیسبووك ڕایگەیاند: ئەمشەو یەكشەممە كاتژمێر 11.50 دڵە جوان و ناسكەكەی فەرید زامداری نووسەر و شاعیر دوای ململانێیەكی سەخت لەگەڵ نەخۆشیدا، لەتەمەنی حەفتا ساڵی لەلێدان كەوت و هەتا هەتایە بەجێیهێشتین.


ئەوەشی خستەڕوو: فەرید زامدار، جگە لەوەی هاوسەری (بێریوان)ی خوشكمان بوو لەهەمان كاتدا بۆ ماوەی پەنجا ساڵیشە وەكو هاوڕێ و ئەندامێكی خۆشەویستی بنەماڵەكەمان بوو.


ئاماژەی بەوەشكرد: هەموو ژیانی بۆ خوێندنەوەو نووسین رەخساندبوو، جگە لەنووسینەكانی چەندین دیوانی شیعری هەر لەشەستەكانی سەدەی رابردووەوە تاكو ئێستا بەچاپ گەیاندبوو لەوانەش (برووسكەی هەوری مەبەستێك، ژوانی سێبەر، بێ ناونیشان، شەڕی وشەكان، میكرۆكۆسم، ئەنیمامۆندی، ستێكس، چەندینیتر).


هەروەها نوسیویەتی: رۆژی دووشەممە یەكەمین رۆژی پرسەكەیەتی لەمزگەوتی ئەبوبەكری سەددیق لەهەولێر.