پشكنینی ئێرباك‌ و سەلامەتی دەچێتەبواری جێبەجێكردنەوە،تاقیگەكان ڕوبەروی سزا دەبنەوە

22/07/2019 - 14:31 بڵاوکراوەتەوە لە هەواڵ/كوردستانی


ھاتووچۆی سلێمانی رایدەگەیەنێت لەساڵی داهاتووەو بەبریاری وەزارەتی ناوخۆ سیستەمی پشكنینی ئێرباك‌ و سەلامەتی دەچێتەبواری جێبەجێكردنەوە،هەرتاقیگەیەكیش ئاسانكاری بكات ڕوبەروی سزا دەبێتەوە.

ئەمڕۆ دووشەممە (22/7/2019) (فەرەیدون عومەر ئەحمەد) بەڕێوەبەری هاتووچۆی پارێزگای سلێمانی لەگەڵ سەرجەم خاوەن تاقیگەكانی پشكنینی ئۆتۆمبێلدا كۆبووەتەوە و رایگەیاندوە"ئامانج لە كۆبوونەوەكە تیشك خستە سەر گرنگی كاری تاقیگەكانی پشكنینی ئۆتۆمبێل بووە بۆ پاراستنی مەرجی توندو تۆڵی لە ئۆتۆمبێلدا ئەویش بەمەبەستی پاراستنی گیانی هاوڵاتیان"
راشیگەیاندوە" لەوەزارەتی ناوخۆوە بڕیار دەرچووە كە پێویستە لەمەودوا سەرجەم تاقیگەكانی پشكنینی ئۆتۆمبێل ئامێر‌و كەرەستەی پێویستیان بۆ پشكنینی ئێرباك‌و پشكنینی پشتێنی سەلامەتیی هەبێت وئەو بڕیارەش لە سەرەتای ساڵی داهاتووەوە دەچێتە بواری جێبەجێكردنەوە "
ئاماژەی بەوەشداوە" هەر تاقیگەیەكیش سەرپێچی ئەو بڕیارە بكات سزای دارایی دەدرێت وە هەر تاقیگەیەك كارئاسانی بۆ ئۆتۆمبێل بكات لەكاتی پشكنیندا ڕووبەڕوی سزای دارایی دەبێتەوە‌و لەكاتی دووبارە بوونەوەدا مۆڵەت لەتاقیگەكە وەردەگیرێتەوە."
بەڕێوەبەری هاتووچۆی سلێمانی لە كۆبوونەوەكەدا جەختی لە بوونی هەماهەنگی نێوان هاتووچۆ‌و تاقیگەكان كردوەتەوە.