سوپای پاسداران دێنە ناو خاكی هەرێم و دوو هاوڵاتی و 200 سەر ئاژەڵ دەبەن

27/07/2019 - 20:22 بڵاوکراوەتەوە لە هەواڵ/كوردستانی

 

 

لە سنوری برادۆست سوپای پاسداران سنور دەبەزێنێت و لە ناو خاكی هەرێمدا ژن و پیاوێك دەستگیر دەكەن و (200) سەر ئاژەڵیش دەست بەسەر دەكەن.

ئەمڕۆ سوپای پاسدارانی ئێران، بۆ دووەم جار لە ماوەی هەفتەیەكدا لە سنوری برادۆست، نزیكەی چوار كیلۆمەتر دێتە ناو خاكی هەرێمی كوردستان و (200) سەر ئاژەڵی ژن و پیاوێك دەست بەسەر دەكەن و خۆشییان دەستگیر دەكەن.

لە ناوچەی كێلەكشینی سەر بە دەڤەری برادۆست، كاتژمێر (11) ی پێشنیوەڕۆی ئەمڕۆ هێزێكی سوپای پاسداران هاتوونەتە ناو سنوری هەرێمی كوردستان و لە شوێنی مەڕدارانی سنورەكە (200) سەر ئاژەڵیان دەست بەسەر كردووەو دوو هاوڵاتیشیان بە ناوی (وسو حالی قادر) و هاوسەرەكەی بەناوی (زبێدە حوسێن شێتۆ) دەستگیر كردووە كە خاوەنی مەڕەكان بوون، بەپێی زانیارییەكان ئەو دوو هاوڵاتییەو ئاژەڵەكانیان لە یەكێك لە پایەگاكانی ئێران دەست بەسەركراون.

لای خۆیەوە (كرمانج عیزەت) قایمقامی شارۆچكەی سۆران بۆ ڕۆژنیوز وتی، سوپای پاسداران چەند كیلۆمەترێك هاتوونەتە ناو خاكی هەرێم و چوونەتە ناو ئاژەڵدارانی سنورەكە لە برادۆست و ژمارەیەكی زۆری ئاژەڵی هاوڵاتیانیان بردووە، لەگەڵ دوو هاوڵاتی كە خاوەنی ئاژەڵەكان بوون.

وتیشی، لە ئێستادا سەرقاڵی بەدواداچونین بۆ ئەوەی هاوڵاتیەكان و ئاژەڵەكانیان ئازاد بكرێن، وە هۆكاری ئەو سنوربەزاندنەش بزانین.

ڕۆژی (21/7) یش لە كوێستانەكانی سنوری حاجی ئۆمەران، سوپای پاسداران سنووریان بەزاندو لەناو خاكی باشوری كوردستان (400) سەر مەڕیان ڕفاندو دواتریش (11) كەسیان دەستگیر كردو دواتر ئازادی كردن.