لەبەر بەرژەوەندی گشتی هاووڵاتیان هاتوچۆ بڕیارێكی ده‌ركرد

05/08/2019 - 09:18 بڵاوکراوەتەوە لە هەواڵ/كوردستانی

بەڕێوەبەرایەتی هاتووچۆی گەرمیان‏ ڕایدەگەیەنێت، "لەبەر بەرژەوەندی گشتی هاووڵاتیان ڕێگا بە وەستانی ئۆتۆمبیلە بارهەڵگرەكان نادرێت لەسەر شەقامی گشتی و نزیك یاریگاكان و كوچە و كۆڵان و سەرجەم شوێنی نزیك نیشتەجێبوون.

لە ڕاگەیەنراوێكدا بەڕێوەبەرایەتی هاتووچۆی گەرمیان بڵاویكردۆته‌وه‌، وەستانی ئۆتۆمبێلی بارهەڵگر لەسەر شەقام و شوێنە گشتیەكان قەدەغە دەكرێت.

له‌به‌شێكی تری راگه‌یه‌ندراوه‌كه‌دا هاتووه‌، سەرجەم شۆفێری بارهەڵگرەكانی سووتەمەنی و ئۆتۆمبیلی گەورە ئاگادار دەكەینەوە لەبەر بەرژەوەندی گشتی بۆ ئەوەی مافی هاووڵاتیان پێشێل نەكرێت و هاووڵاتیان بەدوربن لە كارەساتی دڵتەزێن و ئاستەنگیان بۆ دروست نەبێت ڕێگا بە وەستانی ئۆتۆمبێلە بارهەڵگرەكان نادرێت بەبارەوە یان بە بەتاڵی لەسەر شەقامی گشتی و نزیك یاریگاكان و كوچە و كۆڵان و سەرجەم شوێنی نزیك نیشتەجێ بوونی هاووڵاتیان.

هاتووچۆی گەرمیان داواش لە شۆفێران دەكات، هاوكاریان بن بۆ سەلامەتی گیانی هاووڵاتیان و ئاستەنگ دروست نەكردن بۆیان، بەپێچەوانەوە هەر شۆفێرێك پابەند نەبێت لێرسینەوەی یاسایی لەگەڵدا دەكرێت.