ئه‌نجومه‌نێ كاروبارێن بانگه‌واز ل یه‌كگرتووى ئیسلامی کوردستان پەیامەکێ بەلاڤ دکەت

10/08/2019 - 17:24 بڵاوکراوەتەوە لە هەواڵ/كوردستانی

بسم الله الرحمن الرحیم

 

(وَأَذِّن فِي النَّاسِ بِالْحَجِّ يَأْتُوكَ رِجَالًا وَعَلَىٰ كُلِّ ضَامِرٍ يَأْتِينَ مِن كُلِّ فَجٍّ عَمِيقٍ)الحج 27

جه‌ماوه‌رێ كوردستانێ یێ خوشتڤى

ب هه‌‌لكه‌‌فتا هاتنا جه‌ژنا قوربانى یا پیرۆز ئه‌م ل ئه‌نجومه‌نێ كاروبارێن بانگه‌واز ل یه‌كگرتووى ئیسلامی كوردستان گه‌‌رمترین پیروزباهیان لته‌ڤایا موسلمانێت جیهانێ و خه‌لكێ كوردستانێ دكه‌ین، و ب تایبه‌ت مێڤانێت مالا خودێ، و ماموستایێت ئایینى، و كه‌س و كارێت شه‌هیدان، و خویشك و برایێت خۆ ل ناڤ رێزێت كاروانێ برایه‌تى و چاكسازى و نیشتیمانپه‌روه‌ریێ ل یه‌كگرتووى ئیسلامى كوردستان. هیڤى خازین ببیته‌ جه‌ژنا خێر و خوشی و شادى و به‌خته‌وه‌ریێ، و ملله‌تێ مه‌ ژ هه‌مى ته‌نگاڤى و نه‌خوشیان ب پارێزیت، و ئێمناهى و ئه‌رزانى و برایه‌تی و ئێكرێزیێ بكه‌ته‌ خه‌لات بۆ مه‌ د ڤێ جه‌ژنێدا.

خویشك و برایێت رێزدار هه‌ر بڤێ هه‌لكه‌فتا پیرۆز داخوازێ ژ خه‌لكێ خۆ دكه‌ین جه‌ژنا پیرۆز بكه‌نه‌ ویستگه‌هێ موكمكرنا په‌یوه‌ندیێت مرۆڤایه‌تى و كومه‌لایه‌تى، و چه‌سپاندنا گیانێ لێبورین و پێكڤه‌ژیانێ، و هاریكاریا هه‌ژار و ده‌ست كورتان، و به‌ربه‌لاڤكرنا كه‌یف و خوشى و ئارامیێ، و ڤیانا كه‌لتورێ ره‌سه‌ن بكه‌ینه‌ سیمایێ چه‌ژنێ، و هه‌روسا ئاسه‌وارێت دلته‌نگى و نه‌رحه‌تى و قه‌یران و نه‌هامه‌تیا دناڤ خه‌لكێ خۆدا كێم بكه‌ین.

رێزداران د جه‌ژنا قوربانى یا ئه‌ڤ ساله‌دا هیشتا وه‌لاتێ مه‌ و وه‌لاتێت ده‌ورووبه‌ر ژ قه‌یرانێت ئێمناهى و سیاسى و ئابۆرى قورتال نه‌بووینه‌ و سه‌رهلدانا مه‌ترسیێت جورا وجور د به‌رده‌وامن، له‌وما هشیاریه‌كا زێده‌ و به‌پرساتیه‌كا مه‌زنتر دكه‌ڤیته‌ سه‌ر ملێت ده‌ستهه‌لات و لایه‌نێت سیاسى و گشت هاولاتیان سه‌ره‌ده‌ریه‌كا حه‌كیمانه‌ دگه‌ل هه‌مى پێشهاتان بكه‌ن دا خه‌لك و خاكێ مه‌ یێ پاراستى بیت و جاره‌كا دى نه‌كه‌ڤیته‌ به‌ر قه‌یران و ته‌نگاڤیان. 

ل دوماهیێ دووباره‌ پیروزباهیێ ل خه‌لكێ خۆ یێ خوشتڤى دكه‌ین و هیڤیدار و ئومێده‌وارین ب به‌ره‌كه‌تا ڤان رۆژان خودایێ مه‌زن خێر و خوشى و ئێمناهیێ ب ده‌ته‌ ملله‌تێ مه‌، و دوماهیا هه‌مى نه‌خوشى و ته‌نگاڤیان بیت، و خه‌لكێ مه‌ یێ به‌خته‌وه‌ر بیت، و كوردستان یا ئاڤه‌دان بیت و د پێشكه‌فتن و ده‌ستكه‌فتێت باشتر دابیت.

 

ئه‌نجومه‌نێ كاروبارێن بانگه‌واز

یه‌كگرتووى ئیسلامى كوردستان

9 ذي الحجه‌ 1440

10 / 8 / 2019