سلێمانی... دوا مۆڵەت دەدرێتە نانەواخانە و سەمونخانەكان

17/08/2019 - 11:01 بڵاوکراوەتەوە لە هەواڵ/كوردستانی

 

سەرۆكی لیژنەهاوبەشەكانی قائیمقامیەتی سلێمانی ڕایدەگەیەنێت: دوامۆڵەت دەدەینە خاوەنی نانەواخانە و سەمونخانەكان بۆ جێبەجێكردنی بڕیاری گۆڕینی زەرفی نایلۆن بۆ كیسی كاغەز.

 

گۆران قادر سەرۆكی لیژنەهاوبەشەكانی قائیمقامیەتی سلێمانی بە ڕۆژنامەنوسانی ڕاگەیاند: یەكشەممەی داهاتوو كۆتا ئاگاداركردنەوە دەدەن بە نانەواخانە و سەمونخانەكان بۆ بەكارهێنانی كیسی كاغەز لەبری زەرفی نایلۆن و دوای ئەو وادەیە مۆڵەتی یەك هەفتە دەدەن بە نانەواخانە و سەمونخانەكان بۆ جێبەجێكردنی بڕیارەكە، لە حاڵەتی جێبەجێنەكردنی بڕیارەكەش سزا دەدرێن.

 

ئەوەشی خستەڕوو: زیاتر لە 850 نانەواخانە و سەمونخانە لە سنووری سلێمانی ئاگاداركراونەتەوە بۆ بەكارهێنانی كیسی كاغەز و لەم هەفتەیەدا كارگەی دروستكردنی كیسەكان سەردانی نانەواخانە و سەمونخانەكان دەكات، بۆ چۆنێتیی بەرهەمهێنان و گەیاندنی كیسە كاغەزەكان بەو شوێنانە.