سلێمانی... لە ڕووداوێكی هاتوچۆدا چوار كەس برینداربوون، شۆفێرێكیش هەڵهات

18/08/2019 - 08:58 بڵاوکراوەتەوە لە هەواڵ/كوردستانی

 

بەڕێوبەرایەتی هاتوچۆی پارێزگای سلێمانی ڕایدەگەیەنێت: لەئاكامی ڕووداوێكی هاتوچۆ لەسەر شەقامی بازنەیی مەلیك مەحمود لەنزیك گەڕەكی زەرگەتە چوار كەس برینداربوون.


بەڕێوبەرایەتی هاتوچۆی پارێزگای سلێمانی لە ڕاگەیەندراوێكدا كەوێنەیەكی دەست كوردیو كەوتوە، ڕایگەیاند: ئێوارەی دوێنێ دوو ئۆتۆمبێل لەجۆرەكانی تۆیۆتا كامیری – تۆیۆتا كرۆلا تەكسی لەسەر شەقامی بازنەیی مەلیك مەحمود لەنزیك گەڕەكی زەرگەتە پێكیاندادا، كە هۆكارەكەی پەڕینەوەی پیادە بووە لەشەقامەكە، لەئاكامدا چوار پیادە برینداربوون و ڕەوانەی نەخۆشخانە كراون.


ئەوەشی خستەڕوو: بەوتەی تیمی هاتوچۆ كە گەیشتوونەتە سەر ڕووداوەكە ئۆتۆمبێلی دیكەش لەو ڕووداوەدا بووە بەڵام هەڵهاتووە‌و لەئێستادا تیمی هاتوچۆ لێكۆڵینەوە دەكەن‌و تەماشای كامێرایی چاودێری ئەو شوێنانە دەكەن.