مێردمنداڵێك كوژراو منداڵێكیش كارەبا كوشتی

18/08/2019 - 23:06 بڵاوکراوەتەوە لە هەواڵ/كوردستانی

 

 

لە ڕووداوێكی نادیاردا، مێردمنداڵێكی تەمەن (16) ساڵ لە شارۆچكەی چەمچەماڵ كوژراو لە شارۆچكەی ڕانیەش منداڵێكی تەمەن شەش ساڵ بەهۆی تەزووی كارەباوە گیانی لەدەستدا.

ئەمشەو لەناو بەنزینخانەیەكی شارەدێی شۆڕشی سەربە شارۆچكەی چەمچەماڵی پارێزگای سلێمانی، گەنجێك كوژرا.

(ئەیوب حەمە) جێگری بەڕێوەبەری بەڕێوەبەرێتی تەندروستی چەمچەماڵ وتی : ئەو گەنجە ناوی (زانا عوسمان كامیل)، لەدایكبووی ساڵی (2003) و بە كوژراوی هێندراوەتە نەخۆشخانەی چەمچەماڵ، تا ئێستا نازانرێ بۆ كوژراوە.

هەروەها دوای نیوەڕۆی ئەمڕۆ لە شارۆچكەی ڕانیە، كچێكی تەمەن (6) ساڵ لە خانوویەكی نزیك ماڵەكەیان تەزوی كارەبا لێی داوەو بەهۆیەوە گیانی لەدەستداوە.

بەپێی وتەی ڕاگەیاندنی بەڕێوەبەرایەتی پۆلیسی ڕاپەڕین، منداڵەكە ناوی (ع، ر) لە نەتەوەی عەرەبەو خەڵكی عێراقە، لەكاتێكدا بۆ یاریكردن لەگەڵ منداڵانی گەڕەكەكەیان دەچێتە ناو ئەو خانووەی كە هەیكەلەو تەواو نەكراوە، بەڵام كارەبای لەسەر بووە، تەزووی كارەبا لێی داوەو دەستبەجێ گیانی لەدەستداوە.