قه‌رزی بچوك به‌ هاوڵاتیان ده‌درێت؟

19/08/2019 - 14:58 بڵاوکراوەتەوە لە هەواڵ/كوردستانی

روونكردنه‌وه‌ له‌سه‌ر پێدانی قه‌رزب بچووك به‌هاوڵاتیان ده‌درێت و وەزیری كار و كاروباری كۆمەڵایەتیش  ڕایدەگەیەنێت پێشنیار كراوە كە بخرێتە بەرنامەی كاری چوار ساڵی داهاتووەوە.

كوێستان محەمەد، وەزیری كار و كاروباری كۆمەڵایەتیی حكومەتی هەرێمی كوردستان ڕاگەیاند: "ئێمە دەبێ پرۆژەی قەرزی بچووك بخەینە كارنامەی کاری چوار ساڵی داهاتووەوە و بۆ ئەوەش دەبێ وەك پێشتر لەلایەن حكوومەتەوە سندووقەكە پارەدار(تەمویل) بكرێت، هەرچەندە ئێمە خۆمان پارەی گەڕاوەمان هەیە، بەڵام ئەو بڕە زۆر نییە و بۆ فراوانبوونی پرۆژەكە و دەبێت لە كارنامەكەدا دایبنێین و حكوومەتیش پەسەندی بكات".

هاوكات وەزیری كار و كاروباری كۆمەڵایەتی ئەوەشی خستە ڕوو: "ئەمڕۆ ١٩ی ٨ی ٢٠١٩ لە وەزارەت كۆبوونەوەمان لەسەر بابەتی سندووقی قەرزی بچووك كردووە و سبەینێش كۆبوونەوەیەكی دیكەی لەسەر دەكرێت و كۆمەڵێك پێشنیار بۆ بابەتەكە هەبووە".

 گوتیشی:  "تا ١٠ ڕۆژی دیكە ئێمە كارنامەكەمان تەواو دەكەین و دواتر دەچێتە ئەنجومەنی وەزیران و لەوێ دەبێ پەسەند بكرێت و هەر كاتێك پەسەند كرا، ئێمەش دەست بەكار دەكەین".

لەبارەی ئەوەی چەند پارە بۆ ئەم سندووقی قەرزی بچووك پێویستە؟، كوێستان محەمەد بۆ باسنیوز ئاشكرای كرد: "تا پارەكە زیاتر بێت، دەتوانی پرۆژەی زیاتر بكەیت، ئەوەش دەكەوێتە سەر توانای حكوومەت، دەتوانێت چەند پارەی سندووقەكە زیاتر بكات، باشترە و دەستكاری ڕێنماییەكانی پێدانی قەرزی بچووك ناكەین، چونكە كێشەی نییە و ئەو كەسەش قەرزی پێ دەدرێت دەبێت تەمەنی لە نێوان ١٧ بۆ ٣٠ ساڵدا بێت".

 ئەوەشی خستە ڕوو: "حكوومەت متمانەی بە هاووڵاتییان هەیە بۆ پێدانی قەرزی بچووك، پرۆژەكەش كە پێشتر كاری پێ كراوە و خەڵك قۆناغ و قۆناغ پەرزەكەی گەڕاندووەتەوە، تا ئێستا پێم وایە ٥٠٪ی قەرزەكان هاتووەتەوە، واتە لەو ڕوانگەیەوە كێشەی دانەوەی قەرزمان نییە".