لەمەودوا هیچ فەرمانبەرێك بۆی نیە لێدوان بۆ ڕاگەیاندنەكان بدات

20/08/2019 - 17:35 بڵاوکراوەتەوە لە هەواڵ/كوردستانی


لەلایەن دەستەی دەسپاكی هەرێمی كوردستانەوە فۆرمێك و پاشكۆیەكی 11 لاپەڕەیی بۆ فەرمانگەكان نێردراوە تا فەرمانبەران پڕیبكەنەوە، كه‌ له‌ به‌شێكیدا هاتووه‌ "جگە لەبەرپرسانی باڵا، فەرمانبەر بۆی نییە هیچ لێدوانێك یان چاوپێكەوتنێك لەراگەیاندنەكانەوە ئەنجام بدات".

دڵشاد بابانی، چالاكوانی مەدەنی و ئەندامی دەستەی مامۆستایانی ناڕازی ئەمڕۆ 20ی ئابی 2019 ڕایگەیاند: لەماوەی چەند مانگی رابوردوودا دەستەی دەسپاكی فۆرمێكی بۆ زۆربەی وەزارەتەكان ناردووە، یەكێك لەوانەش وەزارەتی پەروەردەیە، بەداخەوە لەگەڵ ئەو فۆرمە پاشكۆیەكی 11 لاپەڕەیی هەیە رێنماییە، ئەو خاڵانەی تێدایە كە دەبێت فەرمانبەر پێوەی پابەند بێت.

ناوبراو روونیكردەوە: ئەوان چەندینجار هەوڵیانداوە ئەو كارە بەشێوەی روونتر بڕوات و فەرمانبەران لێی ئاگادار بن، بەڵام بەداخەوە بەرپرسی فەرمانگەكان تائێستا ئەو رێنماییانەیان بە دروستی بەفەرمانبەران نەداوە.

بابانی  بۆ دواڕۆژ وتیشی: "هەڵەكەش لەوەدایە هەموو رێنماییەكان بەگشتی بۆ فەرمانگەكان گشتاندنی بۆ كراوە، وەك مامۆستایانی ناڕازی دانیشتنمان لەگەڵ سەرۆكی دەستەی دەسپاكی كردووە و سەرنجەكانمان پێداون بۆ چاككردنیان، ئەویش بەڵێنی بەدواداچوونی داوە، بەڵام تائێستا وەڵامیان نەداوینەتەوە، سەرۆكی دەستەش وتی لەفەرمانگەكانی دیكەش تێبینییان بۆ رۆیشتووە".

رێنماییەكان لە 15 بەشدا خۆی دەبینێتەوە و چەندین وردەكاری لەخۆگرتووە، لە یەكێك لەرێنماییەكاندا هاتووە "جگە لە بەرپرسانی باڵا لە پۆستی وەزیر بەسەرەوە یان ئەوانەی لەو پلەیەدان، فەرمانبەری گشتی بۆی نییە هیچ لێدوانێك یان چاوپێكەوتنێك لەراگەیاندنەكانەوە ئەنجام بدات كە پەیوەندیدار بێت بەكاری بەڕێوەبەرایەتییەكەی، تەنیا بە ڕێگەپێدانێكی روون لەلایەن ئەو بەرپرسەی كە ئەو دەسەڵاتەی هەیە لەناو فەرمانگەكەی، جگە لەمە فەرمانبەری گشتی دەتوانێت مامەڵە لەگەڵ راگەیاندن بكات و لێدوان و چاوپێكەوتن ئەنجام بدات، لەهەر بابەتێك كە پەیوەندی نەبێت بەكارەكانی بەڕێوەبەرایەتییەكەی".

بەشێكی دیكەی رێنماییەكان تایبەتە بەبەشداری فەرمانبەران لەكاری سیاسی و هاتووە "گره‌نتی ئەوە دەدات كە چالاكییە سیاسی و بۆچوونەكانی كار نەكاتەسەر متمانەی ئەو كەسانەی كە مامەڵە لەگەڵ فەرمانگەكەی دەكەن".

هەروەها ئاماژە بەوەدراوە "فەرمانبەری گشتی دەبێت روونكردنەوەی تەواو بدات بەبەڕێوەبەری راستەوخۆی لەڕێكەوتی 30 رۆژ لەوەرگرتنی هەر دیارییەك كە بەهای زیاتر بێت لە 100 هەزار دینار، ئەگەر دیارییەكە بەهای زیاتر بوو لە 500 هەزار دینار، ئەوا بەڕێوەبەری راستەوخۆی لێ ئاگادار دەكاتەوە، ئەگەر دیارییەكە زیاتر بوو لە یه‌ك ملیۆن دینار، ئەوا دەستەی دەسپاكی لێ ئاگادار بكاتەوە".

لەكۆتایی رێنماییەكاندا هاتووە "فەرمانبەری گشتی پابەندە بەسەیركردنی بەندەكانی ئەم رێنماییە و جێبەجێكردنی بەوردی و كارامەیی و لێهاتوویی، لەسەر دەسەڵاتەكان و وەزارەتەكان و لایەنەكانی نەبەستراو بە وەزارەت و دەستە سەربەخۆكان و حكومەتە خۆجێیەكانن هەستن بەئەنجامدانی دەستپێشخەری و بڵاوكردنەوەی و گشتاندنی و شرۆڤەكردنی ئەم رێنماییانە و دانانی رێكارەكان و گره‌نتی تێگەیشتن و پابەندبوونی فەرمانبەران بەحوكمەكانی ئەم رێنماییە".