وەزارەتی دارایی زانیاری لە بارەی پلەبەرزكردنەوەی فەرمانبەران ئاشكرا دەكات

27/08/2019 - 08:45 بڵاوکراوەتەوە لە هەواڵ/كوردستانی

 

 

 

سەرچاوەیەكی بەرپرس لە وەزارەتی دارایی رایگەیاند ، بابەتی دەستپێكردنەوەی پلەبەرزكردنەوە دەكەوێتە دوای دەرچوونی یاسای چاكسازی ، وتیشی:" كە یاسای چاكسازی دەرچوو، هەندێك مووچە ئاڵوگۆڕیان بەسەردادێت،بۆیە كە پەرلەمان یاساكەی دەركرد زۆر شتی باشمان بۆ روون دەبێتەوە و پارەی زۆریش بۆ حكوومەت دەگەرێتەوە".

زیاتر وتیشی:"ئەگەر بۆ قەرەبۆكردنەوەی پلەبەرزكردنەوەی چەند ساڵی رابردوو بێت ئەوە پارەیەكی زۆری دەوێت و ئێستا حكوومەت ئەو پارەیەی لەبەر دەست نیە،چونكە زیاتر لە 4 ملیار دیناری پێویست دەبێت،ئەگەر ئەوانەی پێشووش پارەی پلە بەرزكردنەوەیان بكرێتە پاشەكەوت و ئەوەی ئەمساڵ موستەحەقە پێی بدرێت ئەویش پارەیەكی دەوێت".

جەختی كردەوە پلەبەرزكردنەوەی مافێكی یاسایی فەرمانبەرانە، وتیشی:" كاتی خۆی راگرتنی پلەبەرزكردنەوە بڕیارێكی هەڵە بوو، پلە بەرزكردنەوەی راگیراوە بەڵام نەتواندراوە خانەنشین بوون رابگیرێت، بۆیە كە خانەنشین بوون بەردەوامە دەبوو پلەبەرزكردنەوەش بەردەوام بووایە".

لە ساڵی 2016 وە پلەبەرزکرنەوە ڕاگیراوە لە حاڵی دەستپێکردنەوەیدا نزیکی 680هەزار فەرمانبەر پلەکانیان بەرزدەکرێتەوە و مووچەیان زیاد و ناونیشانیان دەگۆڕدرێت.

ئەو بەرپرسەی وەزارەتی دارایی ئاماژەی بەوەشدا ئەگەر رێكەوتن لەگەڵ بەغدا لەسەر پرسی بودجە بكرێت پلە بەرزكردنەوە و قەرەبۆكردنەوەی فەرمانبەران ئاسان دەبێت، وتیشی: " تاوەكو سەرچاوەیەكی تری دارایی نەیەتە دەست حكوومەت، یان تاوەكو رێكەوتن لەگەڵ بەغدا نەكرێت ناتواندرێت پلەبەرزكردنەوە بكرێتەوە".

ئاوات شێخ جەناب، وەزیری دارایی حكوومەتی هەرێمی كوردستان رايگەیاندوه: بەهۆی ئەوەی داهاتی هەرێم زیادی نەكردووە تاوەكو دەست بكەینەوە بە پلەبەرزكردنەوە و قەرەبۆكردنەوەی پلەبەرزكردنەوەی چەند ساڵی رابردوو".

ئاماژەی بەوەشدا هەموو هەوڵێك دەدەن بۆ ئەوەی لە نزیكترین كاتدا پلە بەرزكردنەوە دەست پێ بكرێتەوە.

پێشووتر وەزارەتی دارایی نوسراوی بۆ ئەنجومەنی وەزیران كردبوو بۆ ئەوەی پلەبەرزكردنەوە دەست پێ بكرێتەوە.

ساڵانە بەشێك لە فەرمانبەران پلەكانیان بۆ بەرزدەكرێتەوە، كە بەشێكیان 4 ساڵ جارێكە و بەشێكی تریشیان 5 ساڵ جارێكە كە بەهۆیەوە ناونیشانی وەزیفیان دەگۆردرێت و مووچەكانیشیان بۆ زیاد دەكرێت.

ئەرشەد لۆلانی ئەندامی لیژنەی دارایی لە پەرلەمانی كوردستان بە (باس)ی راگەیاند پلەبەرزكردنەوە مافێكی یاسایی و دارایی فەرمانبەرانە، گوتیشی: "هەر فەرمانبەرێك لەو كاتەی پلەكەی راگیرابێت لەو كاتەوە بۆی ئەژمار دەكرێت، پلە و ناونیشانیان بەرزدەكرێتەوە مووچەشیان زیاد دەكرێت".

پێشووتر رێباز حەملان، وەزیری دارایی رای گەیاند بوو: " لە ئەمساڵدا حكوومەتی هەرێمی كوردستان پلە بەرزكردنەوە دەكاتەوە، ئەوەی مافی هەبێت بۆی دەگێڕدرێتەوە".