موچەی ئەم توێژە لەمانگی داهاتوەوە ڕێكدەكرێتەوە

27/08/2019 - 15:31 بڵاوکراوەتەوە لە هەواڵ/كوردستانی

بەمنزیكانە موچەی 13 هەزار كەمئەندام كە دوبارە پشكنینیان بۆ كرابوو خەرجدەكرێت، بەڕێوەبەری ڕاگەیاندنی وەزارەتی كارو كاروباری كۆمەڵایەتی حكومەتی هەرێمیش ڕایدەگەیەنێت، "تەنها ئەم مانگە بەمشێوەیە موچە وەردەگرن، لەمانگی داهاتوەوە موچەكەیان ڕێكدەكرێتەوەو لەگەڵ كەمئەندامانی دیكە موچە وەردەگرن".

بەگوێرەی بڕیاری ئەنجومەنی وەزیرانی هەرێم، موچەی 13 هەزار كەمئەندام خەرجدەكرێتەوە كە دوبارە پشكنینیان بۆ كراوەو دەرچون.

ئاریان ئەحمەد بەڕێوەبەری ڕاگەیاندنی وەزارەتی كارو كاروباری كۆمەڵایەتی حكومەتی هەرێم ڕایگەیاند، "خەرجكردنی موچەكە هەندێك وردەكاری ماوەو بەمنزیكانە تەواو دەبێت، بەڵام ناتوانین وادەیەكی دیاریكراو دابنێنین".

وتیشی:"ئەو لیژنەی دوبارە پشكنینیان بۆ كەمئەندامان كردوە، بەگوێرەی ئەو ڕێژەیەی لیژنەكەی دایناوە موچەكەیان بۆ دەبەسترێتەوە".

ناوبراو بۆ سایتی سلێمانی ڕاشیگەیاند، "تەنها ئەم مانگە موچەی ئەو كەمئەندامانە بەمشێوەیە خەرجدەكرێت، لەمانگی داهاتوەوە موچەكەیان ڕێكدەكرێتەوەو بەهەمانشێوەی كەمئەندامانی دیكە خەرجدەكرێت".