دامەزراندن لە كەركوك نیگەرانی و خۆپێشاندانی لێدەكەوێتەوە

29/08/2019 - 10:14 بڵاوکراوەتەوە لە هەواڵ/كوردستانی

 

 

ژمارەیەك لە مامۆستایانی وانەبێژ، گردبوونەوەیەكی ناڕەزاییان ئەنجامدا دژی رێكارەكانی دامەزراندن لە كەركوك و پێیانوایە ستەمیان لێدەكرێت، ئەوەش هاوكاتە لەگەڵ گومانی دەستتێوەردان و بازرگانیكردن بەو پرۆسەیەوە، هەرچەندە بەڕێوەبەری پەروەردە تەحەدا دەكات واسیتە هەبێت.

بەڕێوەبەرایەتی گشتی پەروەردەی كەركوك پرۆسەی پڕكردنەوەی فۆڕمی ئەلیكترۆنی دەستپێكرد بۆ دامەزراندنی دوو هەزارو (841) كەس لە مامۆستا، فەرمانبەر، كارگوزارو پلە وەزیفییەكانی تر.

دوێنێ‌ ژمارەیەك لە مامۆستایانی وانەبێژ بە نوێنەرایەتی زیاتر لە شەش هەزار كەس لەبەردەم پەروەردەدا گردبوونەوەی ناڕەزاییان ئەنجامداو داوایانكرد، وەك بەڵێنیان پێدراوە (50%) ی دامەزراندنەكە بۆ ئەوان بێت.

(سعود جاسم) بەشداربووی گردبوونەوە بە هەڵگرتنی دروشمی (كوا مافەكانمان) بەپێویستی دەزانی نیوەی دامەزراندنیان بەربكەوێت، بەوپێیەی لە نێویاندا مامۆستا هەیە هەشت ساڵە وانەبێژە، بۆ كەركوك ناو وتی : رێژەیەكی زۆر كەمی مامۆستا دیاریكراوە بۆ ئێمەو زۆرینەی دامەزراندنەكە بابەتی شۆفێری و كارگوزارو پاسەوانییە، ئەمەش لای ئێمە قبوڵكراو نییە.

وادەی پێشكەشكردنی فۆڕم بۆ دامەزراندن، بۆ (20) رۆژ بەردەوام دەبێت و تەنیا لە ماوەی (24) كاتژمێردا، زیاتر لە (16) هەزار فۆڕمیان پڕكردۆتەوە، ئەوەش بەپێی ئامارەكانی پەروەردە.

(عەبد عەلی توعمە) بەڕێوبەری گشتی پەروەردەی كەركوك دوای ناڕەزایی مامۆستایانی ناڕازی لە كۆنگرەیەكی رۆژنامەوانیدا جەختیكردەوە لەوەی (50%) ی دامەزراندن بۆ وانەبێژانەو بۆ هەر ساڵێكی خزمەت، یەك خاڵیان بۆ هەژمار دەكرێت.

لە دیاریكردنی ناوی دامەزراواندا بەپێی رێكارەكان، دەبێت كار بە خاڵ بكرێت، ئەو خاڵانەش لەسەر چەند بنەمایەك دادەنرێن كە پەیوەندی هەیە بەبڕوانامە، ساڵانی خزمەت، باری خێزانی، منداڵ و كەسوكاری قوربانیان، دواتر خاڵەكان كۆدەكرێنەوەو خاوەنی زۆرترین خاڵ هەڵدەبژێردرێت. 

ئەو وەڵامەی بەڕێوەبەری پەروەردە دوای ئەوەهات (وەسفی عاسی) سەرۆكی بەرەی عەرەبی لە كەركوك، ئیدارەی پارێزگاكەی تۆمەتباركرد بە كڕین و فرۆشتن بە دامەزراندنی هاوڵاتیانی كەركوك و جەختیكردەوە، دوو هەزارو 800 دەرفەتی دامەزراندن بۆ پەروەردە فرۆشراوەو نرخی هەر دامەرزاندنێك گەیشتۆتە (12) هەزار دۆلار.

(عەبد عەلی) رونیكردۆتەوە، ئەوان لێژنەیان بۆ پرۆسەی دامەزراندن پێكهێناوە لە پێكهاتەكانی كەركوك، سەبارەت بە دانانی بڕگەی دیاریكردنی نەتەوە لە فۆڕمەكاندا، بەڕێوەبەری پەروەردە وتی : لەو هەنگاوەدا مەبەستمانە هاوسەنگی نێوان نەتەوەكان ڕابگرین، رەتیشیكردەوە بەشی هیچ یەكەیەكی ئیداری لە دامەزراندنەكە جیاكرابێتەوە.