لێكۆلینه‌وه‌ی له‌سه‌ر ده‌كرێت.. حكومه‌ت هه‌وا به‌ هاوڵاتیانی ده‌فرۆشێت

08/09/2019 - 15:28 بڵاوکراوەتەوە لە هەواڵ/كوردستانی

 حکومەت لەڕێی کۆمپانیایەکەوە بەشێوەیەکی قۆرخکاری بۆ هەر پێوەرێکی ئاو چل هەزار دینار لە هاوڵاتیان وەردەگرێت، لە کاتێکدا پێوەرەکە بە ١٣ هەزار دینارە له‌گةل ئه‌وه‌ش هه‌وا ده‌خوێنێته‌وه‌.

کازم فاروق، ئەندامی پەرلەمانی کوردستان لە نوسینێکدا لە لاپه‌ره‌ی تایبه‌تی  خۆی لە تۆڕی کۆمەڵایەتی فەیسبوک بڵاویکردوەتەوە، حکومەت لەڕێی کۆمپانیایەکەوە بەشێوەیەکی قۆرخکاری بۆ هەر پێوەرێکی ئاو چل هەزار دینار لە هاوڵاتیان وەردەگرێت، لەکاتێکدا کۆمپانیای تر هەیە کە ئامادەیە هەمان پێوەر بە هەمان جۆر و کوالیتی تەنها بە ١٣ هەزار دینار دابین بکات.

ئەو پەرلەمانتارە ئاماژەی بەوەشکردوە، حکومەت لە هەر پێوەرێکی ئاودا نزیکەی ٢٧ هەزار دینار زیاتر لە هاوڵاتیان وەردەگرێت کە ئەمەش دزیەکی ئاشکرایە، ئەمە جگە لەوەی کە ئەم پێوەرانە لەڕووی کوالیتیەوە لاوازن و هەوا دەخوێننەوە.

ئاماژەی بەوەشکردوە، ئەگەر تەنها ٥ دەقە هەوا بە پێوەرەکەدا بڕوات ئەوا ئەندازەی ٢٠ دەقە ئاو دەخوێنێتەوە، واتە لەهەرجارێکدا کە ئاو دەدرێت بە هاوڵاتیان نزیکەی ٣٠ دەقە هەوا بە پێوەرەکەدا دەروات و پێوەرەکە هێندەی دوو کاتژمێر ئاو دەخوێنێتەوە و حکومەت پارەی ئەو هەوایەش لە هاوڵاتیان وەردەگرێت.

دەشڵێت؛ ئەم بابەتە دەبەینە پەرلەمان و پێیویستە بەزووترین کات وەزارەتی پەیوەندیدار بێتە سەرخەت و ئەم گەندەڵیە ئاشکرایە ڕابگیرێت.