"لەوانەیە قەیرانی دارایی و كێشەی برینی موچە سەرهەڵبداتەوە"

16/09/2019 - 09:29 بڵاوکراوەتەوە لە هەواڵ/كوردستانی

بەرپرسێكی یەكێتی لەبارەی سەردانەكەی بافل تالەبانی زانیاری بڵاودەكاتەوەو راشیدەگەیەنێت لەماوەیەکی نزیکدا گفتوگۆ لەسەر پرۆژەیاسای بودجە دێتەئاراوە، لەوکاتەشدا ئەگەر ھەرێم و بەغدا نەگەیشتنبە ڕێکەوتن، جارێکی دیکە ھەرێم ڕوبەڕوی قەیرانی دارایی دەبێتەوەو ڕەنگە کێشەی بڕینی موچە سەرھەڵبداتەوە.

ڕۆژی 15-9-2019 بافڵ تاڵەبانی بەسەردانێک گەیشتە بەغداو لەگەڵ عادل عەبدولمەھدی سەرۆک وەزیران و ژمارەیەکی زۆر لەبەرپرسانی باڵای عیراق کۆبۆوە.

لەبارەی ئەو سەردانەشەوە، پۆڵا سیروان تاڵەبانی، لێپرسراوی مەڵبەندی بەغدای یەکێتیی نیشتمانیی کوردستان، ڕایگەیاندوە: بافڵ تاڵەبانی لەگەڵ سەرۆک وەزیران و عەمار حەکیم و ژمارەیەک لەکەسایەتییە سیاسییەکان کۆبوونەوەی ئەنجامداوە، بەئامانجی ئەوەی یەکێتی ڕۆڵی باڵا لەچارەسەری کێشەکانی نێوان ھەولێرو بەغدا بگێڕێت.

وتیشی: "پێویستە ئێمە ڕۆڵی خۆمان بگێڕین بۆئەوەی زووتر بگەین بەچارەسەری کێشەکان و ڕێککەوتنێک لەنێوان ھەرێم و بەغدا بێتەئاراوە، بەجۆرێک یەکێتی دەیەوێت پێگەو ڕۆڵی خۆی بەکاربھێنێت بۆ زیاتر لەیەکترنزیککردنەوەی لایەنەکان".

سیروان تاڵەبانی بە SNNی وتوە: کە لەماوەیەکی نزیکدا گفتوگۆ لەسەر پرۆژەیاسای بودجە دێتەئاراوە، لەوکاتەشدا ئەگەر ھەرێم و بەغدا نەگەیشتنبە ڕێکەوتن، جارێکی دیکە ھەرێم ڕوبەڕوی قەیرانی دارایی دەبێتەوەو ڕەنگە کێشەی بڕینی موچە سەرھەڵبداتەوە.