سلێمانی... كۆگایەكی ئەمباركردنی ئاوی لە دەبەنراو دادەخرێت

22/09/2019 - 14:40 بڵاوکراوەتەوە لە هەواڵ/كوردستانی

 

قائیقامیەتی قەزای مەڵبەندی سلێمانی ڕایدەگەیەنێت: بەهۆی خراپ ئەمباركردن و نەشیاوی شوێنەكە لیژنە كۆگایەكی ئەمباركردنی ئاوی لە دەبەنراو لەگەڕەكی زەرگەتەی شاری سلێمانی دادەخرێت.

 

قائیقامیەتی قەزای مەڵبەندی سلێمانی لە ڕاگەیەنراوێكدا كە وێنەیەكی دەست كوردیو كەوتووە ڕایگەیاند: ئەمڕۆ یەكشەممە لیژنەی بەدواداچونی بەرهەمهێنانی ئاوی لەدەبەنراوی سەربەلیژنە هاوبەشەكانی قائیمقامیەتی سلێمانی دوای چەندین جار ئاگاداركردنەوە لەكەموكوڕیەكانی و پابەند نەبوون بە جێبەجێكردنی مەرج و ڕێنماییەكان كۆگایەكی ئەمباركردنی ئاوی لەگەڕەكی زەرگەتە داخست تا پابەندی سەرجەم مەرج و ڕێنماییەكانی كاركردن دەبێت.

 

ئاماژەی بەوەشداوە: هۆكارەكانی داخستنی كۆگاكە بەرزی پلەی گەرمی ناو كۆگاكەیە كەئامێری ساردكەرەوەی تیا نیە لەگەڵ دانانی ئاو لەبەرتیشكی خۆرو گەرمی سەر شۆستەو شەقامی كۆگاكەی كەبەهیچ جۆرێك ڕێپێدراو نیە چونكە دانانی ئاو لەبەر تیشكی خۆر كاریگەری خراپی تەندروستی لەسەر پیًكهاتەی ئاو دروست دەكات و دەبێتە هۆی زیان گەیاندن بە تەندروستی هاوڵاتیان لەبەر ئەم هۆكارە و لە پێناو پاراستنی تەندروستی هاوڵاتیان بە بڕیاری قائیمقامی سلێمانی هەڵگرتن و گواستنەوەی ئاوی خواردنەوە لەبەر تیشكی خۆر قەدەغە كراوە.

 

ووتیشی: بەبڕیاری قائیمقامی سلێمانی كۆگاكە دادەخرێت تا پابەندی سەرجەم مەرج و ڕێنماییەكانی كاركردن دەبێت.

ئەلبوومی وێنەکان